ЭМЯ-аас коронавируст цар тахлын нөхцөл байдлын талаар мэдээллээ.

Энэ үеэр ХӨСҮТ-ийн Дархлаажуулалтын албаны дарга О.Дашпагма сэргээх нэмэлт тунгийн талаар мэдээлэл өгөв.

Тэрээр “Монгол Улс нийт хүн амынхаа 2.3 сая хүнийг вакцинжуулах зорилт тавьсан. Одоогийн байдлаар нийт хүн амын 69 хувийг нь нэгдүгээр тун, 65 хувийг хоёрдугаар тунгаар дархлаажуулсан байна. Вакцинд хамрагдах ёстой 2.3 сая иргэний 95 хувийг нь нэгдүгээр тунг, 90 хувийг хоёрдугаар тунгаар дархлаажуулаад байна.

Нэмэлт гуравдугаар тунд 280 мянга гаруй буюу хоёрдугаар тунд хамрагдсан иргэдийн 12 орчим хувийг дархлаажуулаад байна. Эхний хоёр тунгаа хийлгээд гурван сар болсон иргэн гэмэлт гуравдугаар тунд сайн дураар хамрагдах боломжтой.

Гуравдугаар тунд хамрагдсан иргэдийн 10 орчим хувийг Вероселл, 9 орчим хувийг Астразенека, 80 орчим хувийг Пфайзер вакцинаар дархлаажуулсан байна.

Мөн энэ жил 2-11 насны хүүхдүүдийг томуугийн эсрэг вакцинд хамруулна. Одоогийн байдлаар томуугийн вакцинд хамруулах ажил улсын хэмжээнд 51.5 хувьтай үргэлжилж байна.

Үүнээс гадна жирэмсэн эмэгтэйчүүдийг томуугийн эсрэг вакцинжуулалтад хамруулж байгаа” гэлээ.