Монголын Үндэсний Олимпын хороонд МУГТ Э.Цэндбаатар албан ёсоор хүсэлт гаргаж буйгаа мэдэгдлээ.
Тэрээр ирэх Аравдугаар сард болох Дэлхийн аварга шалгаруулах тэмцээнд оролцох хүсэлтэй байгаагаа илэрхийлж, хүсэлтээ өөрийн биеэр хүргэж өгсөн юм.
МУГТ Э.Цэндбаатар "Намайг Дэлхийн аварга шалгаруулах тэмцээнд явуулах бүх боломжоор хангаж өгөхийг хүсэж байна. Би тэнд өөрийгөө харуулмаар байна. Би одоо 25 настай. Боксын тамирчны карьер 30 хүрээд л дуусдаг. Энэ бол миний орох дэлхийн аваргын сүүлчийн тэмцээн. Тиймээс үүнд заавал оролцож, Монголынхоо нэрийг гаргаж, ард түмнээ баярлуулахыг хүсэж байна.
Хэрвээ би энэ тэмцээнд орж чадахгүй бол маш их харамсана. Миний амьдралдаа хамгийн их харамсаж, гомдож явах зүйл бол энэ дэлхийн аварга шалгаруулах тэмцээнд орж чадаагүй явдал байх болно. Эсвэл дэлхийн аварга шалгаруулах тэмцээнд явуулах тамирчныг сорилоор сонгохыг хүсэж байна” гэлээ.
Түүнийг ДАШТ-д оролцох боломжийг олгоход туслах хүсэлтэй иргэд гарын үсэг цуглуулах давлагаа өрнүүлж эхэлсэн байна.