Цэргийн цол олгох журам, цэргийн хувцас өмсөх дүрэмд өөрчлөлт оруулахаар болсон. Энэ талаар Батлан хамгаалахын сайд Г.Сайханбаяр цахим хуудсаараа дамжуулан мэдээлж байсан билээ. 

Тэгвэл энэ талаар Батлан хамгаалахын сайд Г.Сайханбаяр дэлгэрэнгүй тайлбарлажээ. 

Тэрээр "Цэргийн цол шагнал биш, албан тушаалын илэрхийлэл. Цэргийн сургууль төгссөн, алба хаасан хүмүүст олгодог байх ёстой.

Монгол Улсад цэргийн цол олгох зохистой харьцаа алдагдсан. Энгийн, цэргийн мэргэжлийн бус, цэргийн алба хаагаагүй хүмүүст шагналын журмаар цэргийн цол олгодог явдал олон жил үргэлжилсэн. Ялангуяа улс төрийн, төрийн захиргааны, орон нутгийн захиргааны албан тушаалтнуудад дайчилгааны үүрэгтэй нь холбогдуулаад богино хугацааны сургалтаар цэргийн цолыг хавтгайруулан олгож ирсэн гажуудал өнөөдрийг хүртэл байна. Энэ гажуудлыг арилгана.

Хоёрдугаарт, цэргийн дүрэмт хувцасны замбараагүй хэрэглээ байна. Дүрэмт хувцсыг зах зээл дээр чөлөөтэй борлуулж, иргэд, малчид, ажиллах хүчин ажлын хувцас болгон хэрэглэж байна. Цэргийн дүрэмт хувцсыг алба хааж, цэргийн албан тушаал хашиж байгаа хүмүүс хэрэглэх ёстой, дүрмээр тогтоогдсон зүйл.

Мөн урлаг, спортынхонд цэргийн цол олгодог явдал байна. Жишээ нь, цолоо ахиулсан үндэсний бөх, тэмцээн уралдаанд амжилт үзүүлсэн тамирчдад ахлах офицерын цол буюу хошуучаас хурандаа хүртлэх цол олгодог болсон. Цэргийн мэргэжилтэй тамирчин байж болно, спортын байгууллага толгойлж болно. Гэхдээ цэргийн алба хаасан, цэргийн сургуульд боловсрол эзэмшсэн, албан тушаалын шаардлага хангасан байх шаардлага тавина.

Эдгээрийн цэгцлэх үүднээс Ерөнхийлөгчийн захирамжаар ажлын хэсэг байгуулагдаад ажиллаж байна. Ойрын хугацаанд Ерөнхийлөгчийн шийдвэр гарч цэргийн цол олгох журам, цэргийн хувцас өмсөх дүрэмд өөрчлөлт орно.

Мөн өмнө нь тушаалаар олгогдсон цэргийн цолыг хурааж авна гэхээсээ илүү цаашид цэргийн цол олгох зохицуулалтыг хэм хэмжээнд нь барьж явна гэдэг шийдэлд хүрсэн байгаа. Цэргийн мэргэжилгүй ч армид 20-30 жил алба хаасан цэргийн цолтой хүмүүсийн цолыг хураах нь зохимжгүй гэж үзсэн" гэлээ.