Монголын чөлөөт бөхийн холбоо Норвегийн Осло хотод аравдугаар сарын 2-10-ны өдрүүдэд болох "Осло-2021" насанд хүрэгчдийн Дэлхийн аварга шалгаруулах тэмцээнд оролцох баг тамирчдаа сонгох хяналтын барилдааныг есдүгээр сарын 3-5-нд Төв аймгийн Батсүмбэр суманд байрлах "Аваргууд" академийн "Champions Camp"-д зохион байгууллаа.
Хяналтын барилдаанд оролцсон тамирчид, дасгалжуулагч, шүүгч нар Улсын онцгой комиссын халдвар хамгааллын дэглэмийг чанга сахиж, бүх хүмүүс коронавирусийн түргэвчилсэн шинжилгээнд хамрагдсан юм.
Эрэгтэйчүүдээс 92 кг-ын жинд "Хасу-Мегастарс" клубийн залуу тамирчин Д.Оргилох "Mongolia Open" ОУТ-ий олон удаагийн медальт, насанд хүрэгчдийн улсын аварга Б.Нямбаяр, Л.Төртогтох нарын туршлагатай олон хэмжээний мастеруудыг ялж, дэлхийн дэвжээнд зодоглох тийзээ захиалав.
Эмэгтэйчүүдийн өрсөлдөөнд 50 кг-д "Женко" клубийн 20 настай залуу тамирчин Д.Отгонжаргал ОУХМ Ц.Намуунцэцэг, спортын мастер Б.Мөнхнар нарыг ялсан. 57 кг-д Токиогийн олимпод зодоглосон Баянхонгорын Б.Хонгорзул хэсгийн барилдаанд ОУХМ Э.Даваачимэгийг ялсан. Тэгвэл шигшээд тэд дахин таарахад хашир мастер Э.Даваачимэг өрсөлдөгчөө 5:1-ээр туршлага заан ялж дэлхийн шилдгүүдтэй өрсөлдөхөөр болов.
Хамгийн сонирхолтой жин болох 62 кг-д ДАШТ-ий алт, мөнгөн медальт, гавьяат тамирчин С.Цэрэнчимэд, 23 хүртэлх насны ДАШТ-ий хүрэл медальт ОУХМ Э.Гантуяа, "Токио-2020" олимпод оролцсон ОУХМ Х.Болортуяа нар бие биеээ тойрч ялсан бөгөөд Э.Гантуяа онооны чанараар аваргаллаа.
Тус тэмцээний үеэр ДАШТ-ий нэг мөнгө, гурван хүрэл медальт, гавьяат тамирчин Очирбатын Насанбурмаа, ОУХМ Баттулгын Нямдорж нар дэвжээндээ хүндэтгэл үзүүлж зодог тайлсан юм.
ДАШТ-д оролцох Монголын баг тамирчид:
-
Эрэгтэйчүүдийн 57 кг: Эрдэнэбатын Бэхбаяр (Хүч)
-
61 кг: Түмэнбилэгийн Түвшинтулга (МУБИС)
-
65 кг: Төмөр-Очирын Тулга (Хүч)
-
70 кг: Батчулууны Батмагнай (Алдар)
-
74 кг: Энхбаярын Бямбадорж (Алдар)
-
79 кг: Бямбасүрэнгийн Бат-Эрдэнэ (Хилчин)
-
86кг: Ганбаатарын Ганхуяг (МУБИС)
-
92 кг: Дагвадоржийн Оргилох (Хасу-Мегастарс)
-
97 кг: Өлзийсайханы Батзул (Аврагч)
-
125 кг: Мөнхтөрийн Лхагвагэрэл (Хилчин)
-
Эмэгтэйчүүдийн 50 кг: Долгоржавын Отгонжаргал (Женко)
-
55 кг: Эрдэнэчимэгийн Сумъяа (Хилчин)
-
57 кг: Эрхэмбаярын Даваачимэг (Хилчин)
-
59 кг: Баатаржавын Шоовдор (Аврагч)
-
62 кг: Энхбатын Гантуяа (Хилчин)
-
65 кг: Түвшинжаргалын Энхжин (Алдар)
-
68 кг: Энхсайханы Дэлгэрмаа (Хасу-Мегастарс)
-
72 кг: Энх-Амарын Даваанасан (Алдар)
-
76 кг: Найгалсүрэнгийн Загардулам (Хилчин)
Эх сурвалж: МЧБХ