Манай улсад эрүүл мэндийн ажилчид болон хариу арга хэмжээний багийнханд гуравдугаар тунг хийж эхлээд буй. Мөн иргэдэд гуравдугаар тун хийх эсэхийг судалж байгаа гэж ЭМЯ-наас мэдээлсэн билээ. 

Тэгвэл гуравдугаар тун дельта хувилбараас хамгаалах эсэхийг Оном сангийн ТУЗ-ийн дарга Д.Наранбаатарын ярьсныг тоймлон хүргэе.

-Монгол Улсын иргэдэд түгээмэл хийгдсэн вакцинууд дельта хувилбараас хамгаалах уу?

-Астразенека, Фпайзер-Саармагжуулах эсрэг биет үүссэн буюу дельта хувилбарын халдвар авахгүй байх хувь нь 30 орчим хувь. Тэгэхээр эдгээр вакцинуудыг хийлгэсэн хүмүүсийн 70 орчим хувь нь дельта хувилбараар халдварлах боломжтой.

Спутник-Хамгаалахгүй. Халдвартай хүний хавьтал болох, ойрхон байх үед авах магадлал өндөр. Спутник вакцины хоёр тунд хамрагдсан иргэдийн 92 хувьд нь саармагжуулах биет үүсээгүй буюу дельта хувилбарын халдвар авахгүй байх боломжтой биет байхгүй байна. Тиймээс Спутник вакцин хийлгэсэн иргэдийн ихэнх нь дельта хувилбараар өвчлөх боломжтой.

Синофарм-Саармагжуулах эсрэг биет үүсээгүй буюу дельта хувилбарын халдвараас хамгаалах биет байхгүй байна. Тиймээс синофармын хоёр тун вакцин хийлгэсэн хүмүүс дельта хувилбараар халдварлах 100 хувийн боломжтой.

Тэгэхээр дельта хувилбар анхны хувилбараасаа илүү төвөгтэй гэдгийг харуулж байна.

-Гуравдугаар тун буюу нэмэлт вакциныг хийхэд дельта хувилбараас хамгаалах уу?

-Нэмэлт вакциныг хийснээр бүх зүйл сайхан болж, бүгд хэвийн амьдралдаа орохгүй. Халдвар авах боломжтой. Гэхдээ нэмэлт вакцин хийлгэсэн бол өвчний хүндрэл, нас баралтаас хамгаална.

Астразенека вакцины хоёр тун дээр фпайзер вакциныг нэмэлтээр хийвэл илүү үр дүнтэй байгаа. Залуу эмэгтэйчүүдэд сөрөг нөлөө гарах нь бага боловч бусад нөлөөнүүдээсээ хамгийн их эрсдэлтэй байна. Манай улсад нийт нэг сая гаруй Фпайзер вакцин орж ирсэн. Синофарм вакцины хоёр тун хийлгэсэн иргэдэд нэмж Фпайзер вакцины хоёр тунг хийхэд ямар байх талаар судалгаа одоогоор байхгүй.