Өчигдөр Токиогийн олимпын -57 жинд боксын төрлийн тэмцээн явагдлаа. Медалийн төлөөх тоглолтод МУГТ Э.Цэндбаатар ОХУ-ын Алберт Батыргазиевтай тулалдаж, 3:2 харьцаатайгаар ялагдал хүлээлээ. Түүний тоглолтын шүүлт эргэлзээтэй байсан тул Монголын баг зөвлөлдөж "тулааны үр дүнг хүлээн зөвшөөрөхгүй" байгаагаа мэдэгдэж ОУОХ-ны бокс хариуцсан мэргэжилтэнтэй уулзан гомдол гаргаад байна.
Харин тэмцээний дараа МУГТ Э.Цэндбаатар сэтгэгдэлээ хуваалцжээ.
Тэрээр "Эхний раундад хожсон. Хоёрдугаар раундад оноогоороо хожсон байх гэж бодож байна. Гурав дахь раундад идэвх алдчихлаа. Өрсөлдөгч маань сайн тамирчин байна. Ялахын тулд өөрийн бүх хүчээ тултал гаргалаа. Болж өгсөнгүй. Харамсаж байна. Уучлалт хүсэж байна. Намайг дэмжсэн Монголын ард түмэндээ баярлалаа" гэсэн юм.
Дашрамд, монголын талаас заргын бичиг үйлдсэн бөгөөд шүүгчийн шийдвэр буруутай нь батлагдвал зөвхөн тухайн шүүгчийг шийтгэх аж. Харин тоглолтын үр дүнг хэвээр үлдээх эсвэл манай талд ялалтыг өгөх шийдвэр гаргах эсэх нь тодорхойгүй байна.
Токио-2020 Зуны XXXII дахь олимпын наадмаас Монголын тамирчид Жүдо бөхийн төрлөөр гурван медаль аваад байна.
-
Жүдо бөхийн эрэгтэйчүүдийн 81 кг-д Саиед Моллай мөнгөн медаль
-
Жүдо бөхийн эмэгтэйчүүдийн 48 кг-д М.Уранцэцэг хүрэл медаль
-
Жүдо бөхийн эрэгтэйчүүдийн 73 кг-д Ц.Цогтбаатар хүрэл медаль.
Өнөөдөр Монголын гурван тамирчин Хүндийг өргөлт, Чөлөөт бөхийн төрөлд хүч сорино.
