Засгийн газрын Хэвлэл, олон нийттэй харилцах хэлстийн дарга Ц.Ганзориг Засгийн газрын шийдвэрийн талаар мэдээлэл хийлээ.

Тэрээр "Зургаадугаар сарын 15-наас хойш вакцины үр дүн гарч Долоодугаар сарын 1 гэхэд халдварын тархалт буурч эхэлнэ гэж тархвар судлаачид үзэж байна.  

Давтан тундаа хамрагдсан иргэдийн 0,5 хувь нь халдварт өртсөн байна. Хөл хөдөлгөөн 95 хувиар нэмэгдсэн. Долоодугаар сарын эхээр бодит үр дүн гарна гэж эрдэмтдийн баг үзэж байгаа юм. Тийм учраас тайвшрах эрт байна. Засгийн газрын тэргүүн хатуу хөл хорио тавихгүй гэж мэдэгдсэн" гэлээ.

Мөн Хүүхдийн мөнгө, цахилгааны хөнгөлөлтийн талаар үргэлжлүүлэн мэдээллээ. Тэрээр "Долоодугаар сарын 1 хүртэл иргэд, өрх, ААН-д үзүүлж байсан ус, цахилгаан, дулаан, хог гээд дөрвөөс таван төрлийн хөнгөлөлт чөлөөлөлт үзүүлж, Засгийн газраас зардал гаргаж байсан. Энэ асуудлыг Долоодугаар сарын 1-нд дуусгах эсвэл үргэлжлүүлэх эсэх асуудлыг ҮАБЗ шийднэ. Ковидын нөхцөл байдал даамжирч хүндэрвэл үргэлжлүүлнэ гэж Ерөнхий сайд ажлын 100 дахь хоногийн тайлан дээр хэлсэн байгаа. Тэгэхээр төсвийн тодотгол хийнэ. Мөн ҮАБЗ-ийн эхний хурлаар хэлэлцэнэ.

Дулааны улиралд газар тариалан, барилга байгууламжийн бүхий л үйл ажиллагаа идэвхэждэг учраас хатуу хөл хорио тогтоохгүй гэсэн байр суурьтай байна. Долоодугаар сараас шинэ нисэх буудлаа ашиглалтад оруулах, жуулчин авах, бүтээн байгуулалтын зэрэг улирлын шинж чанартай асуудлуудыг шийдвэрлэх ажлууд хийгдсээр байна" гэлээ.