Засгийн газрын Хэвлэл, олон нийттэй харилцах хэлстийн дарга Ц.Ганзориг вакцинжуулалтын талаар мэдээлэл хийлээ. 

Тэрээр “Засгийн газраас 2.5 сая Pfizer вакцин татаж авах гэрээ хийсэн. Эхний 100 мянган тунг хүлээн аваад байгаа. Дараагийн 170 орчим мянган тун вакцин Зургаадугаар сарын 16, 21-нд бууна.

Засгийн газар АстраЗенека, Pfizer, Синофармын вакциныг нөөцлөөд явж байгаа.

Ирэх Даваа гарагаас жирэмсэн эмэгтэйчүүдийг сайн дурын үндсэн дээр Pfizer вакцинд хамруулж эхэлнэ.

Эмийн хатуу зохицуулалттай дэлхийн улс орнууд 100 хувь үр дүн гарсан учраас хүүхдийн вакциныг хүлээн зөвшөөрөөд байгаа. Монгол Улсын Засгийн газрын хувьд олон улсын практикийг харж, нөөцөө бүрдүүлсний үндсэн дээр эцэг эхийнх нь зөвшөөрлөөр хүүхдүүдийг вакцинд хамруулах бэлтгэлийг хангаад явж байна.

Сүүлийн үед хүн амын 40 орчим хувийг эзэлдэг хүүхдүүд халдвар өртөх нь нэмэгдэж байна.

Одоогоос 21 хоногийн өмнө халдвар авч байгаа иргэдийн 10 хувь нь хүүхэд байсан бол өнөөдөр 20-30 хувь болж нэмэгдсэн байна. Халдвар авсан гурван хүн тутмын нэг нь хүүхэд байна гэсэн үг. Тиймээс олон улсын стандартын дагуу сайн дурын үндсэн дээр хүүхдүүдээ вакцинд хамруулах нь нэн тэргүүний ажил болоод байна" гэв.