Эрүүл мэндийн яамнаас дархлаажуулалтын явцын талаарх мэдээллийг өглөө.
ЭМЯ-ны хэвлэлийн ажилтан Б.Ууганбаяр "Вакцины нэгдүгээр тунд Улаанбаатар хотод 933,704 хүн, орон нутагт 885,172 хүн хамрагджээ. Харин хоёрдугаар тунд Улаанбаатар хотод 543,261 хүн, орон нутагт 160,763 хүн хамрагдсан байна.
Улсын хэмжээнд 1,818,876 хүн нэгдүгээр тунд хамрагдсан бол 704,024 хүн хоёрдугаар тунд хамрагдаад байна.
18-19 насны иргэд дархлаажуулалтдаа идэвхтэй хамрагдахыг хүсье.
Өнөөдөр Улаанбаатар хотод 29 мянган хүнийг дархлаажуулах төлөвлөгөө гарган дархлаажуулалтын цэгүүд ажиллаж байгаа тул дархлаажуулалтандаа идэвхтэй хамрагдахыг уриалж байна. Мөн хөдөө алслагдмаал сумдад байгаа иргэдийг дархлаажуулах ажил үргэлжилж байгаа" гэлээ.
ХӨСҮТ-ийн Дархлаажуулалтын албаны дарга О.Дашпагма "Энэ сарын 20-ны байдлаар нийт 2,633,900 хүн тун вакцин хийсэн байна. Иргэд vis.health.gov.mn/survey хаягаар орж вакцины дараа илэрч буй хариу урвалыг бүртгүүлэх боломжтой. Энэ бүртгэлийн систем дээр 75 мянга гаруй иргэн хариу урвалаа бүртгүүлсэн байна. Иргэдэд илэрч буй хариу урвалыг харвал вакцины зааварт тусгагдсан түгээмэл шинж тэмдгүүд байгаа.
Мөн орон нутагт дархлаажуулалт хожуу эхэлсэн учраас хоёр дахь тунг энэ сарын 22-25-нд нэгдсэн байдлаар эхлүүлхээр байгаа" гэлээ.
