Коронавируст халдварын нөхцөл байдлын талаар мэдээллээ. Энэ үеээр ХӨСҮТ-ийн дэд захирал Ж.Байгалмаа халдварын тархалтын үе шатаас хамаараад улс орнууд эмийн бус хариу арга хэмжээг авч хэрэгжүүлж байгаа талаар мэдээлэв.

Тэрээр "Эмийн бус хариу арга хэмжээ буюу тодорхой хязгаарлалтууд болон хатуу хөл хориог хэрэгжүүлээд явж байна. Хатуу хөл хорионы дэглэмийг өвчлөлийн нөхцөл байдлаасаа хамааруулаад өөр өөрийн онцлогт тохируулаад хэрэгжүүлдэг.

Тухайлбал, эрүүл мэндийн байгууллагын нөөц хүндэрсэн тохиолдолд хатуу хөл хориог авч хэрэгжүүлж байгаа. 

Манай улсад дотоодын анхны халдвар 2020 оны арваннэгдүгээр сарын 10-нд бүртгэгдсэн. Түүнээс хойш дөрвөн удаа хөл хорио тогтоогоод байна. Эхний хөл хориог нэг сар, дараагийнх нь 21, гурав дахь нь 10 хоногийн хугацаатай байсан. Дөрөв дэх удаагийн хөд хорио одоо үргэлжилж байна. 

Анхны хөл хориог урт хугацаатай хэрэгжүүлсний үр дүнд өвчлөлийг тодорхой хэмжээгээр бууруулж чадсан. Харин гурав дахь хөл хорионы дараагаас халдварын тоо тасралтгүй нэмэгдэж байна.

Шинжилгээнд эерэг эзлэх хувь манай улсад 5 хувь байгаа. Шинжилгээнд эерэг эзэлж байгаа хувийг долоо хоног бүрээр гаргадаг бөгөөд өнгөрсөн долоо хоногт 9 хувь болж өссөн" гэлээ. 

Мөн тэрээр "Эхний хөл хорионоор хүмүүсийн хөдөлгөөн 40-60 хувиар буурсан харин одоогийн хөл хорионы үеэр хөдлөгөөн 15 хувиар л буурсан үзүүлэлттэй байна. 

Энэ удаагийн хөл хорио энэ сарын 25-нд дуусахаар байгаа бөгөөд үргэлжлүүлэн халдварын том давалгаа гарахаар байна. 

Харин хөл хориог дахин 7 хоногоор сунгавал хөл хорионы дараа дахин давалгаа гарах ч аажмаар буурах дүр зураг харагдаж байгаа" гэлээ. 

Түүнчлэн, нийт батлагдсан тохиолдлын тоо буурахын хэрээр хүнд, маш хүнд болон нас баралт буурах хандлагтай байгааг онцлов.

Мөн хэрвээ хөл хорио тавихгүй, вакцин хийгүй бол өдөрт бүртгэгдэх халдварын тоо 30 мянгад хүрэх магадлалтай гэсэн юм.