Эрүүл мэндийн яамны өнөөдрийн мэдээллээр сүүлийн 24 цагийн хугацаанд 1340 хүнээс өвчний шинэ тохиолдол бүртгэгдэж, нийт өвчилсөн хүний тоо 21,995 болоод байна.
Мөн коронавирус халдварын улмаас нийт 44 хүн нас бараад байна.
Нийслэлд тогтоогоод буй хатуу хөл хорионы үр дүн ямар байгаа талаар ЭМЯ-ны хэвлэлийн ажилтан Б.Ууганбаяр дараах мэдээллийг өглөө.
Тэрээр "Хамтарсан тандалт судалгаа, хариу арга хэмжээний баг ажиллаж байна. Энэ баг нь ойрын болон дам хавьтлыг илрүүлж, тэдгээр хүмүүсээс шинжилгээ авснаар халдварын шинэ тохиолдлуудын тодорхой хувийг илрүүлж байгаа.
Өнөөдрийн батлагдаж байгаа тохиолдлууд нь хатуу хөл хорионоос өмнө нь халдвар авсан хүмүүсийн нууц үе өнгөрөөд илэрч байгаа гэдгийг мэргэжлийн хүмүүс хэлж байна. Тийм учраас хатуу хөл хорионы үр дүн гарах болоогүй, ирэх долоо хоногоос гарах дүр зураг ажиглагдаж байгаа.
Мөн иргэд халдварын шинэ тохиолдол нийслэлийн яг аль дүүрэг, хороо, байрнаас гарсныг тодорхой хэлэхийг шаардаж байгаа. Гэвч илэрч байгаа тохиолдлуудыг тодорхой хэлэх нөхцөлгүйгээр өргөн хүрээнд тархаад байна" гэлээ.
