Улсын Онцгой комиссоос Дөрөвдүгээр сарын 10-25-нд хатуу хөл хорио тогтоох саналыг Засгийн газарт хүргүүлсэн.
Уг саналыг Засгийн газрын ээлжит бус хуралдаанаар хэлэлцэж, энэ бямба гаригаас буюу Дөрөвдүгээр сарын 10-наас 15 хоногийн хугацаатай бүх нийтийн бэлэн байдлын зэрэгт шилжих шийдвэрийг дөнгөж сая гаргалаа.
Энэ талаар Ерөнхий сайд Л.Оюун-Эрдэнэ "Эрхэм хүндэт иргэддээ энэ өдрийн мэндийг хүргэе. Улс орон бүхэн өөр өөрийн арга барилаар цар тахалтай тэмцэж байна. Цар тахлын даван туулах цорын ганц арга зам бол дархлаажуулалт. Монгол улсын Засгийн газар Дөрөв болон Тавдугаар сарыг үндэсний хэмжээнд дархлаажуулалтын сар болгон зарласан. Энэ ажил үр дүнд хүрч өнөөдрийн байдлаар 526,553 иргэнийг вакцинжуулаад байна. Нийт иргэдийн 26 хувийг дархлаажуулсан гэсэн үг. Бид азидаа тэргүүлж байгаа" гэлээ.
Мөн тэрээр үргэлжлүүлэн "Энэ амаргүй үед эдийн засгийн эргэлтийг зогсоох нь туйлын хүндрэлтэй тул иргэн бүрд 300 мянган төгрөгийн нэг удаагийн тусламжийг олгохоор боллоо. 2021 оны хоёрдугаар сарын 25-нд төрийн санд 229.7 тэрбум төгрөг төвлөрсөн. Энэ нь Оюутолгойгоос татварт төвлөрүүлэх ёстой байсан мөнгө гэсэн үг. Гуравдугаар сарын 4-нд 419.1 тэрбум, 30-нд 365.5 тэрбум төгрөг буюу нийт 1 их наяд 26.5 тэрбум төгрөг төрийн санд төвлөрсөн.
Засгийн газраас баялагтаа эзэн байх зорилтыг дэвшүүлж байгаагийн хувьд болон вакцинжуулалтаа үр дүнд хүргэж, эдийн засгаа тогтвортой нээхийн тулд, иргэдээ хөл хорионы хугацаанд сөхрөөхгүйн тулд уг эх үүсвэрээ иргэн бүрдээ зориулах нь шударга ёсонд нийцнэ гэж үзсэн" гэлээ.
Харин Сангийн сайд Б.Жавхлан "3.3 сая иргэндээ өнөөдрөөс эхлэн 300,000 төгрөгийн санхүүгийн дэмжлэг олгоно. Энэ үйл явц 7-10 хоног үргэлжлэх ч аль болох богино хугацаанд арилжааны банкуудаар дамжуулан зохион байгуулна" гэв.