АН-ын Х Их хурал маргааш цахимаар хуралдаж, намын шинэ даргыг батламжилна.

АН-ын даргын сонгууль хоёр тусдаа зарлагдаж, хоёр дарга сонгосон хэдий ч намын Их хурал зөвхөн нэгийг нь батламжлах ёстой. Тиймээс маргааш болох намын Х Их хурлаар цахим сонгуульд ялалт байгуулсан М.Тулгатын нэрийг оруулахаа АН-ын дарга С.Эрдэнэ зарлаад байгаа. Харин Ц.Тувааны талынхан өнгөрөгч бямба гаригт Дүнжиргаравын өмнөх задгай талбайд ээлжит бус Бага хурал зарлаж, УИХ-ын гишүүн О.Цогтгэрэлд АН-ын даргын сонгуульд ялалт байгуулсан батламж гардуулжээ.

Энэ үйл ажиллагаанд УИХ-ын гишүүн Д.Ганбат, А.Адъяасүрэн, Н.Ганибал болон ЕТГ-ын дарга асан З.Энхболд гэх мэт Ерөнхийлөгч Х.Баттулгад шууд харьяалагддаг нөхөд, “Тесо” компанийн ажилчид ирж оролцсон байдаг. Том оврын автобусаар хүн зөөвөрлөж олноор нь нэг дор цуглуулан гадаа талбайд зохион байгуулсан энэ хуралд 21 аймаг, Улаанбаатарын 9 дүүргээс 1210 хүн ирж оролцсон тухай Дотоод сонгуулийн хорооноос мэдээлсэн.

Харин АН-ын дарга С.Эрдэнэ энэ үйл явдлыг “Ийм ёс зүйгүй, дүрмийн бус үйлдэл хийж байгаа нөхдүүдтэй хуулийн хүрээнд хариуцлага тооцно. АН-ын нэрээр хууль дүрмийг уландаа гишгэсэн төлбөртэй хурал зохион байгуулж, цар тахлын үед намын гишүүд, нам бус иргэдийг олон зуугаар нь цуглуулан эрүүл мэнд амь насыг нь эрсдэлд оруулж байгаад харамсаж байна!” хэмээн мэдэгдсэн.

Энэ тохиолдолд хоёр тусдаа явуулсан сонгуулийн дүнгээр хоёр тал ямар нэг зөвшилцөл хийх боломжгүй болсон гэсэн үг. О.Цогтгэрэл гишүүний /уг нь Ц.Тувааны/ яарч сандран хийсэн энэ алхам өмнөх удаа намын гишүүдийн 50 гаруй хувиар дэмжсэн итгэл, сэтгэлийг үгүй хийчихлээ. Товчхондоо О.Цогтгэрэл гишүүн өөрөө ширээн дээрээс ойчсон хэрэг болов.