“УБ-Сонгдо” эмнэлгийн ерөнхий захирал Б.Болдсайхан санаачлан “Зүрх мартахгүй” төслийг 2020 оны тавдугаар сард эхлүүлж, зүрхний төрөлхийн эмгэгтэй хүүхдийг эрт илрүүлж, мэс заслын тусламж үзүүлж эхэлснээс хойш өнөөдөр 99 дэх хүүхдэдээ мэс засал хийжээ.

Зүрхний мэс заслын эмчилгээний өртгийг сайхан сэтгэлт хүмүүс болон албан байгууллагын хандиваар босгож бяцхан зүрхнүүдэд амьдрал бэлэглэж байсан билээ.

Эрүүл мэндийн даатгалын үндэсний зөвлөлийн шийдвэрээр Эрүүл мэндийн даатгалын сангаас хариуцах тусламж үйлчилгээний санхүүжилтийн шинэчилсэн журам саяхан батлагдсан. Уг журамд хорт хавдар, цус харвалт, зүрхний шигдээс, түлэгдэлт, төрөлхийн гажиг, төрөх, эмэгтэйчүүд, халдварт өвчин гэх мэт амь нас аврах нэн шаардлагатай, өндөр өртөгтэй эрүүл мэндийн тусламж үйлчилгээг 100 хувь эрүүл мэндийн даатгалын сангаас санхүүжүүлэхээр тусгасан билээ. Үүнд зүрхний мэс засалд орох бага насны хүүхдүүдийн эмчилгээний зардал мөн багтах юм байна.



Дөрвөн сартай хүүхдийн зүрхний цоорхой нөхөх хагалгааг өнөөдөр /2021.03.01/ амжилттай хийсэн “Зүрх мартахгүй” төслийн багийнханд Эрүүл мэндийн сайд С.Энхболд баяр хүргэж, батламж гардууллаа.


Сайд С.Энхболд “Иргэд гадаадад өндөр төлбөртэй хийлгэдэг хагалгааг эх орондоо эрүүл мэндийн даатгалаас хөнгөлүүлж хийлгэх бүрэн боломж нээгдлээ. Төр, хувийн хэвшлийн эмнэлэг гэж ялгахгүйгээр Эрүүл мэндийн даатгалын сангаас хөнгөлөлт олгох учраас иргэд эмнэлэг, эмчээ өөрөө сонгож хамгийн чанартай эмчилгээ, үйлчилгээг авах боломж бүрдэж байна. Иргэн бүр өөрийн эрүүл мэнддээ анхаарч эрсдэлгүй чанартай, хүртээмжтэй эрүүл мэндийн тусламж үйлчилгээг эх орондоо авдаг байхын төлөө хичээнгүйлэн ажиллах болно” хэмээн онцлон хэллээ.