Монгол улс Ковид-19 цар тахлын эсрэг дөрвөн төрлийн вакцин оруулж ирж хүн амынхаа 60 гаруй хувийг дархлаажуулахаар төлөвлөсөн байгаа.
Өнөөдөр өглөө БНЭУ-аас хандивласан 150 мянган тун буюу 75 мянган хүнийг вакцинжуулах Оксфордын АстраЗенека вакцин Улаанбаатарт ирээд байна.
Мөн өнөө орой Бээжин-Улаанбаатар чиглэлийн тусгай үүргийн онгоцоор Хятад улсаас хандивлаж буй 300 мянган тун Verocell вакцин ирнэ.
Вакцины эхний тунг Ерөнхий сайд Л.Оюун-Эрдэнэ хийлгэж, иргэдээ уриалах бол хоёр дахь тунг Эрүүл мэндийн сайд С.Энхболд хийлгэж эрүүл мэндийн салбарын ажилтнуудаа уриална.
Монгол улсад маргаашнаас дархлаажуултын ажил эхлэх бөгөөд эдгээр 450 мянган тун вакцин нь ДЭМБ-ын COVAX хөтөлбөрийн хүрээнд Энэтхэг, Хятад улсаас илгээж буй буцалтгүй тусламж юм.
Дашрамд, Улсын Онцгой комиссын Хэвлэлийн төлөөлөгч Ц.Ганзориг вакцинжуулалтын талаар өнөөдөр мэдээллэхдээ "БНХАУ-д үйлдвэрлэсэн Синофарм вакцин өнөөдөр орой манай улсад ирнэ. ДЭМБ-аас энэ вакцины зөвшөөрөл гарахаар хүлээгдэж байгаа юм. Зөвшөөрөл нь гармагц дархлаажуулалтыг эхлүүлэхэд бэлэн байхын тулд татан авч байна гэсэн үг юм.
Манай улс БНХАУ-д үйлдвэрлэсэн Синофарм, ОХУ-д үйлдвэрлэсэн Спутник V болон Pfizer, AstraZeneca хэмээх дөрвөн төрлийн вакциныг хадгалах дэд бүтцийг шийдвэрлэж, бэлтгэлийг бүрэн хангасан байгаа" гэлээ.
Харин Эрүүл мэндийн сайд С.Энхболдын мэдээлснээр "БНХАУ-аас 320 мянган хүн тун, ОХУ-аас 50 мянган хүн тун вакциныг хандиваар авахаар төлөвлөсөн байгаа" гэсэн билээ. Уг хоёр төрлийн вакцинд ДЭМБ одоогоор зөвшөөрөл олгоогүй байгаа бөгөөд ирэх гуравдугаар сард зөвшөөрөл олгох төлөвтэй байгааг албаныхан мэдээллээд байна.
