Эрүүл мэндийн яамнаас коронавируст халдварын нөхцөл байдлын талаар мэдээлэл хийлээ.

ХӨСҮТ-ийн Тандалт судалгааны албаны дарга А.Амбасэлмаа "Өчигдөр 12,828 хүнд шинжилгээ хийхэд 20 хүний сорьцод коронавирусийн халдвар илэрлээ. 20 тохиолдол бүгдээрээ Улаанбаатар хотод бүртгэгдсэн бөгөөд хоёр тохиолдол нь Токио-Улаанбаатарын онгоцоор ирсэн иргэдийн давтан шинжилгээгээр илэрсэн. Зөөвөрлөгдсөн тохиолдол ингээд 397 болж байна.

Өнгөрсөн 24 цагийн хугацаанд 79 хүн эдгэрч, эмнэлгээс гарлаа.

Ингээд улсын хэмжээнд бүртгэгдсэн 1,195 тохиолдлоос 824 хүн буюу 69 хувь нь эдгэрээд байна.

Өнөөдрийн байдлаар ХӨСҮТ, Цэргийн төв эмнэлэг, Яармагийн 300 ортой эмнэлэг, Сэлэнгэ аймгийн нэгдсэн эмнэлэгт 361 хүн эмчлэгдэж байна. 

Баянзүрх дүүргийн эмнэлгийн голомттой хамааралтай халдварын гинжин хэлхээ гэр бүл, ойрын болон дам хавьтлын хүрээндтарсаар нийт халдвар авсан хүний тоо 244 боллоо. Үүнийг задалбал, эрүүл мэндийн ажилтан 27, гэр бүлийн хүмүүс 77, өвчтөн 98, бусад хүмүүс 9, хамт ажиллагсад 1 гэсэн үзүүлэлттэй байна. Өчигдрийн хувьд гэхэд хавьтлын тоо 50-иар нэмэгдэж, нийт хавьтал 1494 болсон. Эмнэлэг, ажиглах байранд тусгаарласан хүмүүсийн 3-4 дэх давтан шинжилгээг хийгээд байна" гэлээ. 

Өчигдөр "Тэнүүн-Огоо" компанийн автобусны нэг жолоочоос халдвар илэрсэн. Өнөөдөр тухайн авто баазын хоёр ажилтнаас нэмж халдвар илэрчээ. Халдвар авсан жолооч бусад арваад хүмүүсийн хамт салхинд гарсан нь халдвар тархах үндэс болсон байна. Бусад хавьтал болох 90-ээд хүнээс шинжилгээ авахад коронавирус одоогоор илрээгүй байна. 

Сүүлийн 24 цагийн хугацаанд Сэлэнгэ, Дархан-Уул, Говьсүмбэр, Орхон, Архангай, Дорноговь аймгийн голомтоос батлагдсан тохиолдол бүртгэгдээгүй. Мөн Улаанбаатар хотын өмнөх батлагдсан тохиолдлуудаас батлагдсан тохиолдол бүртгэгдээгүй байна.