Ойрд хүн бүрийн чих нүдийг цар тахал, цагаан ордон хоёр их татаж байна. Трамп, Жо Байдэнийг гараа дэлгээд Цагаан ордонд оруулах уу эсвэл сунжралдаж “ерөнхийлөгч” титэмтэйгээ чадах ядахаараа зууралдах уу гэдэг асуултын хариултыг мэдэх, үгүй бол цар тахал хөл хорьсон энэ үеийг хэрхэн хүн дүрсээ алдахгүйхэн шиг туулах вэ гэдэг том сэдвүүд дээр гол анхаарал төвлөрөөд хэсэг хугацаа өнгөрөв.

Азаар хориннэгдүгээр зууны залуучуудад хэн нэгний санал болгосон эсвэл олон нийтийн бөөнөөрөө үзэж дагасан жум түмэн кино, ном зохиолын дарамтанд дараастай байдаг үеийнхэн билээ.

Хэрвээ танд хэн нэгэн санал болгож амжаагүй, эсвэл танд санал болгосон ч та үзэж амжаагүй бол The Crown буюу Титэм цувралыг эхнээс нь үзэхийг бидний зүгээс санал болгоё.

Арваннэгдүгээр сарын 15-нд Нетфликсийн Английн хатан хаан II Элизабетийн амьдрал, цаг үеийн эрс сэргэн босолтын талаар хийсэн цувралын дөрөв дэх бүлэг олны хүртээл болсон. Дөрөв дэх бүлэг дээр “бидний” хайртай энэ гэр бүлийн хамгийн алдар нэртэй гүнж Дианагийн дүр орж ирсэн. Энэхүү бүлэг цацагдснаас хойш гурван сая гаруй уншигч Их Британий хаан ширээний тухай нийтлэл, түүний дотор хатан хааны гэр бүлийн аль нэгнийх талаар хайлт хийж, нийтлэл уншжээ. Мэдээж энэ цуврал баримтат кино биш. Магад баримтат кино байсан бол хүмүүсийн анхаарлыг ингэтэл татахгүй, олон мянган үзэгчдийг байлдан дагуулахгүй байсан биз. Гэхдээ л энэхүү цувралыг үзсэнээр түүхийн анхан шатны мэдээлэлтэй болно гэдэгтээ итгэлтэй байж болно. 

Энэ цуврал дөрвөн бүлэг, нийт дөчин анги хийгдсэн байгаа. Кино Элизабет гүнж гэрлэж байгаагаар болон Уиллим Черчиль хоёр дахь удаагаа Английн ерөнхий сайд болж байгаагаар эхэлдэг. Нэг бүлэг арван ангитай бөгөөд анги бүр нь гүн гүнзгий утга агуулга, бүүдгэр ихэмсэг өнгө будгаар бүтсэн байдаг.

Дашрамд, англи хэл сураач гэж бүр бусдаар загнуулан барин залхан сурж байгаа хүмүүст агуу Английн түүхийн нэг хэсгийг үзэнгээ яруу тансаг үгийн баялагтай болох, үг өгүүлбэрийн холбоос хэрэглээнд болон утганд яаж шингэж, гагнагдаж гарч ирдэгийг харах, сурах, дагах сайхан боломж гэдгийг дуулгая. 

Та хэзээ нэгэн цагт англи хүн морь унахдаа “Go, go” гэж хэлдэг нь бид морь уралдахыг харахдаа “Гүүг, гүүг” гэдэгтэй холбоотой байж магадгүй юм гэж бодож байсан уу? Энэ цувралын хэсгээс ийм дур зураг олж хараад “шогширсон” хүний хувьд тансаг хэлтэй болох хүсэлтэй хүмүүст заавал үзэх ёстой кино шүү гэж зөвлөе.

Бү.Лхамаа