Эрүүл мэндийн яам ээлжит коронавируст халдварын нөхцөл байдлын талаар мэдээллээ.

ХӨСҮТ-ийн Тандалт, судалгааны албаны дарга А.Амбасэлмаа "Өчигдрийн 11:00 цагаас хойш улсын хэмжээнд нийт 18,031 хүнд шинжилгээ хийхэд 26 тохиолдолд халдвар илэрлээ.

Улаанбаатарт 2 шинэ тохиолдол бүртгэгдсэн бөгөөд өмнөх тохиолдлын ойрын хавьтал тул халдвартын клиникт тусгаарлагдаж байсан. Өнгөрсөн 24 цагийн хугацаанд Сэлэнгэд 9, Орхонд 1, Дархан-Уулд 11, Дорноговьд 2 тохиолдол шинээр батлагдлаа. Мөн ХӨСҮТ-ийн нэг ажилтнаас халдвар илэрлээ. 

Өнөөдөр хоёр хүн эдгэрч ХӨСҮТ-өөс сувиллын ажиглалтад шилжиж байна. Нийт батлагдсан тохиолдол 738 болсон бөгөөд үүнээс 384 хүн эмчилгээнд байна. Биеийн байдлыг үнэлбэл, нэг хүний биеийн байдал маш хүнд, аппаратанд байгаа. Энэ хүн 80 настай бөгөөд архаг хууч өвчнүүдтэй хүн юм.

Хүнд 5, хүндэвтэр 72, хөнгөн 306 хүн байгаа" гэв.

Коронавируст халдвар дотоодод тархаад буй байдал: 

• Сонгино хайрхан дүүрэг - 10

• Баянгол дүүрэг - 16

• Хан-Уул дүүрэг - 7

• Баянзүрх дүүрэг -18 

• Сүхбаатар дүүрэг - 12

• Багануур дүүрэг - 1

• Чингэлтэй дүүрэг - 1,

Улаанбаатар хотод нийтдээ 65 тохиолдол бүртгэгдлээ. 

Орон нутагт: 

• Дархан-Уул - 33

• Дорноговь - 20

• Орхон - 22

• Говьсүмбэр - 3

• Сэлэнгэ аймагт 157 байна.

Нийт улсын хэмжээнд дотоодын халдвар 300 тохиолдол болоод байна.

Мөн тэрээр "Халдварын нууц үеийн хугацааг ДЭМБ-аас 1-14 хоног гэж үзсэн, тэгвэл монгол улсад 29 хүнд судалгаа хийхэд 3-13 хоногт шинжилгээгээр вирус илэрсэн. Харин халдварын нууц үеийг 5-7 хоног байна. Энэ нь тухайн хүний биеийн онцлогоос хамаарч байгаа юм" гэлээ.