Эрүүл мэндийн сайд Т.Мөнхсайхан болон холбогдох албаныхан өчигдөр орой ХӨСҮТ-д коронавирусийн халдварын эсрэг авч буй хариу арга хэмжээ, эмнэлгийн тусламж үйлчилгээ болон цаг үеийн асуудлаар шуурхай хуралдлаа. 

Шуурхай хурлаар Эрүүл мэндийн сайд дараах асуудлыг шийдвэрлэжээ.

Үүнд: 

• Энхсаран сувилалд ажиглалтад байсан хүмүүсийг ХӨСҮТ-д тусгаарлах. ХӨСҮТ-д орны бэлэн байдлыг бүрэн хангаж, шөнөдөө ХӨСҮТ-ийн тусгаарлалтанд байршиж дууссан байна.

• Халдварын голомтонд ажиллаж буй бүх эмнэлгийн ажилчид 5 сая төгрөгийн урамшууллыг авсан. Харин лаборантууд, жолооч нар, вируслогийн ажилчид нэмэлт урамшуулалд хамрагддаггүй байсныг нөхөн олгохоор болов. 

• Мөн нэг удаагийн эмнэлгийн хэрэгслээр бүрэн хангах нөөц байгаа учраас ХӨСҮТ-ийн хэрэгцээт бүх хэрэгслээр хангах;

• Илүү цагаар болон чартер нислэг тосч шөнө, өдөргүй ачаалалтай ажилласан удирдах ажилтнуудын илүү цагийг олгох; 

• Коронавирусийн халдварын үед ажиллаж буй ХӨСҮТ-ийн бүх авто машинуудын засвар үйлчилгээ, даатгал зэрэг холбогдох бүх зардлыг ЭМЯ-аас шийдэх; 

• ХӨСҮТ-ийн мэс заслын тасгийн тоног төхөөрөмжийг сайжруулах, нэн шаардлагатай аппаратуудыг шийдвэрлэж өгөх; 

• Эмзүйн албаны агуулах байрны асуудлыг шийдвэрлэх; 

• Голомтонд ажиллаж буй эмч, ажилчдын амрах байр, хэсгийг илүү тав тухтай, тохилог орчноор бүрдүүлэх төсвийг шийдэж өгөх; 

• Коронавирусийн халдвар авсан эмч, сувилагчийн ар гэрт сэтгэл санааны дэмжлэг үзүүлэх;

Мөн шуурхай хурлаар ХӨСҮТ-ийн хоёр лифтийг шинэчлэх зэрэг асуудлыг нэн даруй шийдвэрлэхээр болжээ.