Коронавирусийн халдвар авсны улмаас ХӨСҮТ-д эмчлэгдээд эдгэрсэн Франц иргэн нутагтаа очоод шинжилгээ хийлгэхэд COVID-19 огт тусаагүй байсан гэх мэдээлэл олон нийтийн сүлжээгээр тараад байгаа билээ. 

Энэ талаар ХӨСҮТ-ийн Ерөнхий захирал Д.Нямхүү Эрүүл мэндийн яамны ээлжит мэдээллийн үеээр тайлбар өглөө.

Тэрээр “Олон нийтийн сүлжээгээр коронавирусийн улмаас манай улсад эмчлэгдээд буцсан Франц иргэнийг нутагтаа очоод шинжилгээ өгөхөд биеэс нь эсрэг биет илрээгүй гэх ташаа мэдээлэл тарааж байгаа нь харамсалтай. Худал мэдээлэл хамгийн хортой зүйл.

Дээрх ташаа мэдээлэл гарсантай холбоотойгоор бид Франц иргэнтэй утсаар холбогдож тодруулсан. Тэр нутагтаа очоод шинжилгээ өгсөн нь үнэн. Гэхдээ түүний биед коронавирусийн эсрэг биет буюу дархлаа сайн тогтсон байна гэж Францын лаборатори хариу өгсөн тухай бидэнд мэдэгдсэн.

Энэ нь сайн эмчлэгдсэн гэсэн үг бөгөөд 78 хувийн эсрэг биет үүссэн байгааг нотлох шинжилгээний бичгийн зургийг бидэнд имейл, фейсбүүкээр илгээсэн.

Франц иргэн энэ завшааныг ашиглан өөрийг нь эмчилсэн эмч нар болон Монголын Засгийн газарт дахин баярлаж, талархдагаа илэрхийлж, ажлын амжилт хүссэн.

Тэр ер нь үргэлж бидэнтэй цахимаар болон утсаар холбогдож өөрийн биеийн байдлын талаар хэлж, эмчилсэн хүмүүстээ талархаж явдгаа илэрхийлдэг.

Дэлхий дахин коронавирусийн эсрэг тэмцэж байгаа ийм онцгой үед ташаа мэдээлэл тарааж байгаа нь маш бусармаг, дайсагнаж байгаа үйлдэл.

Манай улс коронавируст халдварын нийт тохиолдлынхоо 96.8 хувийг эмчилсэн гэдэг бол дэлхийд дээгүүр яригдах үзүүлэлт шүү.

Франц иргэн үнэхээр харамсалтай байгаагаа илэрхийлсэн. Худал мэдээлэл Франц иргэн болон түүнийг эмчилсэн эмч нарын маань ч сэтгэл санаанд нөлөөлж, эвгүй байдалд оруулж байна” гэв.