Эрүүл мэндийн сайд Т.Мөнхсайхан: “Дэлхий даяар тархаад буй коронавируст халдварыг дотооддоо алдахгүйн төлөө ЭМЯ гамшгаас хамгаалах өндөржүүлсэн бэлэн байдлыг ханган ажиллаж байна. Шинэ төрлийн коронавируст халдвар  хамгийн түрүүнд уушгийг гэмтээдэг. Ингэснээр тухайн хүн хүчилтөрөгч амьсгалын дутагдалд ордог. Харин шинээр нэвтрүүлж буй уушги, зүрх орлуулагч ECMO аппаратаар хүчилтөрөгчийн дутагдалд оруулахгүйгээр уушгины үйл ажиллагааг сэргээх боломжтой болж байна. Мөн манай улсын эрчимт эмчилгээ нэг шат ахиж байгаа юм. Цаашид манай улсад зүрхний өвчтөнийг мэс засалд бэлдэх, тоног төхөөрөмж хүлээгдэж буй үед тухайн өвчтөнийг хүчилтөрөгчөөр хангаж, зүрхний үйл ажиллагааг дэмжих боломж бий болж байна. Түүнчлэн эрхтэн шилжүүлэн суулгах мэс засалд донор хүлээгдэж байгаа өвчтөн донор гарч ирэх хүртэлх хугацаанд дэмжлэг олгох боломжоор хангагдаж байгаа юм” хэмээв.

УНТЭ-ийн Зүрхний эмгэг судлалын тасгийн эрхлэгч Д.Эрдэмбилэг: “Зүрхний шигдээс өвчний үед зүрхний үндсэн үйл ажиллагаа алдагдсанаас амьсгал, зүрх судасны дутагдал үүсдэг. Энэ үед зүрхний булчингийн судсыг тодорхой хугацааны турш онгойлгохоос гадна зүрхний үндсэн шахуургын үүрэг гүйцэтгэж, зүрхний агших чадварыг сэргээж хэвийн үйл ажиллагааг энэхүү ECMO аппаратаар орлуулах боломжийг бүрдүүлсэнд талархалтай байна. Уушгины хатгалгаа нь хүндэрсэн өвчтөн амьсгалын аппаратад орсон ч үр дүнгүй байгаа тохиолдолд энэхүү аппаратыг ашигласнаар уушги хатуурахгүй, сэргэх боломжтой болж байна гэсэн үг” гэв.

Тус эмнэлэгт ECMO аппаратын ашиглалт, аюулгүй ажиллагаа болон мэргэжилтнүүдийг сургах сургалтыг зохион байгуулж буй аж. Онол, практик хосолсон хоёр өдрийн сургалтад Эрчимт эмчилгээний, зүрхний, уушгины болон эрхтэн шилжүүлэх эмч нараас гадна инженер техникийн ажилчид хамрагдаж байна. Сургалтыг онлайнаар БНХАУ-ын эмч, мэргэжилтнүүд хийж байгаа бөгөөд аппарат хэрэгслүүдийг угсрах, суурилуулах зэрэг ажлыг хэрхэн гүйцэтгэх, ашиглах талаар үргэлжилж байна.