ЭМЯ-ны ээлжит хэвлэлийн хурал болж, коронавируст халдварыг илрүүлэх шинжилгээний хариунуудыг танилцууллаа.
ХӨСҮТ-ийн ерөнхий захирал Д.Нямхүү: "Долдугаар сарын 6-нд дөрвөн лабораторид 757 хүний сорьцод шинжилгээ хийхэд 752 хүний шинжилгээнд коронавирус илрээгүй. Харин Алтанбулаг, боомтоор орж ирсэн таван хүний шинжилгээнд коронавирус илэрлээ.
757 хүний шинжилгээг хийхэд лабораторид олон эмч нар маань цаг наргүй ажиллан энэ их ажлыг амжуулж байна.
Өнөөдөр зургаан хүн эдгэрч ХӨСҮТ-өөс гаран, дараагийн ажиглалт руу шилжиж байна. Эдгэрсэн хүмүүсийн хоёр нь Сөүлийн онгоцоор ирсэн бол дөрөв нь Нур Султанаас ирсэн бөгөөд 38, 29, 11, 6, 39, 12 настай хүмүүс байгаа.
Өчигдөр Алтанбулаг боомтоор орж ирсэн 85 хүнийг тусгаарлаж, сорьц цуглуулах ажлыг зохион байгуулж байна" гэв.