УИХ-ын сонгууль болоход ердөө 23 хоног үлдлээ. Үнэн худал нь мэдэгдэхгүй, зорилготой зорилгогүй нь мэдэгдэхгүй үй түмэн мэдэгдэл, мэдээлэл дунд сонгогчид живж байна. Худал хуурмаг попууд цаашилж, мэргэжлийн, мэргэшсэн гэх тодотголтой хүмүүс наашлах цаг айсуйг сонгогчид мэдэрч буй заа. Иймд бид өнөөдрийн нэр дэвшигчид дунд гялайж гялтайх тун цөөхөн хуульчид байгааг өнөөдрийн дугаараараа онцлон хүргэж байна. Ингэхдээ АН, МАН, бие даагч гэж ангилан ялгахыг хүссэнгүй.
АРДЧИЛСАН НАМД ДАХИН “ЦОЙЛОГЧ” Х.ТЭМҮҮЖИН
АН-аас нэр дэвшиж буй гайгүй гэх хүмүүсийн тодотголд Х.Тэмүүжин зүй ёсоор багтана. Тэрээр Төв аймагт нэр дэвшиж буй. 2016 онд өвдөг шороодож өнжсөн. Учир нь түүнийг улстөрд байхгүй болтол нь балбасан, улстөрийн карьерийг нь балласан. Тэр сайд болуутаа маш зоримог шинэчлэл, өөрчлөлтүүд хийж улс-төрийн дараагийн үе ирснийг зарлаж орхисон. Бас вант улс шиг болсон хүчний байгууллагынхантай шууд гардан тулаанд орсон нь түүнийг ийнхүү газар уруу хүчтэй гэгч нь түлхэж орхисон билээ. Гэвч тэр ёс суртахуунаа гээлгүй, зарчмаа хамгаалсан ноён нуруу нь хугараагүй. Одоо тэр өвдгөө гөвөөд шинээр дахин босож буй. Ардчилсан намд дахин “цойлох” хүнээр Х.Тэмүүжин гэх автор нэрлэгдэж буйг онцлох хэрэгтэй.
“БОЛОМЖИЙН ХҮН” Ж.СҮХБААТАР
Ж.Сүхбаатарыг УИХ-д нэр цэвэр, шударга гишүүдийн тоог нэмж, мэргэжлийн хуульч, төлөвшсөн төрийн түшээ гэж үнэлж намын дарга У.Хүрэлсүх Чингэлтэйд илгээжээ. Дараагийн Парламентад мэргэжлийн гарамгай хуульч Ж.Сүхбаатарын туршлага, чадвар хэрэгтэй гэж УИХ-ын дарга үнэлсэн. Түүний хувьд гайгүй гэх тодотголд багтах цөөхөн хэдэн нэр дэвшигч хуульчдын нэгт зүй ёсоор багтана. Тэрээр МУИС-ийн Хууль зүйн ухааны магистр, докторант цолтой. “Улаанбаатар Эрдэм” Хууль зүйн сургуульд багшаар ажлын гараагаа эхэлж байж. 30 гаруйхан настайдаа УИХ-ын гишүүн болж, зоригтой дуугарч, болохгүй, бүтэхгүй зүйлийг эсэргүүцэж явсан имиж түүнийх. Намынхаа булхай луйврыг эсэргүүцэж, МАНАН-тай тэмцэж, намдаа хариуцлага тооцож намаасаа гарсан. Тэр Т.Бадамжунай тэргүүтэй МАНАН мафийг эсэргүүцэж байсан анхны тэмцэгч юм. Түүний зөв байсныг цаг хугацаа ч харуулсан.
Поп улстөрчид моодонд орсон энэ цагт тэр бодлого ярьдаг, бодлого боловсруулдаг “боломжийн хүн” гэдгээрээ ялгарч байгаа. Тиймээс шударга гишүүдийн тоог нэгээр нэмж тодрох “Боломжийн хүн”-ээр нэрлэгдэж байна. Ж.Сүхбаатар гэдэг бие хүн нь бус, түүний эрдэм мэдлэг, туршлага парламентын гадна үлдэнэ гэдэг Монголын төрд л хайран билээ.
БИЕ ДААГЧДИЙГ “ӨНГӨЛӨХ” ЗАЛУУ ХУУЛЬЧ Ж.ЭРХЭМБААТАР
Салхи залуучууд руу эргэх цаг болсны нэг илэрхийлэл Ж.Эрхэмбаатар гэх залуу хуульч. Тэрээр цоо шинээр бие даан нэр дэвшиж буй. ЖДҮ хулгайн талаар дуу хоолойгоо илэрхийлэн, салхи сэвэлзүүлж орж ирсэн залуучуудын төлөөлөл. ЖДҮ-гийн луйврыг дарахын тулд захиргааны шүүхийг татан буулгах гэж байгаа тухай олон нийтийн сүлжээгээр орилж олны анхааралд оруулж, бас өөрөө орж ирсэн нэгэн. Өнөөдрийн нийгэмд мэдлэгтэй, мэргэшсэн, асуудлын гүн рүү ордог, шудрагаар дуугардаг залуу үеийн төлөөлөл нэн шаардлагатай байгаа. Үүнийг нөхөх хүний нэг хэмээн эл залуу үнэлэгдэж буй юм.
Эх сурвалж: EGUUR.MN
