ЭМЯ-наас коронавируст халдварын нөхцөл байдлын талаар 11 цагийн ээлжит мэдээллээ хийж, ХӨСҮТ-ийн ерөнхий захирал Д.Нямхүү тусгаарлалтад байгаа хүмүүсийн болон тандалтын зорилгоор хийсэн коронавирусийн халдварын илрүүлэг шинжилгээний хариуны талаар мэдээлэл өглөө.

Д.Нямхүү: "Эх үрсийн баярын мэнд хүргэе. Тавдугаар сарын 31-нд гурван лабороторид нийт 371 хүнд шинжилгээ хийснээс 365 хүний шинжилгээнд коронавирус илрээгүй. Үүнд, тандалтын зорилгоор цуглуулсан найман сорьцод вирус илрээгүй. 

Тусгаарлалтад байсан зургаан хүний давтан шинжилгээнээс коронавирус илэрлээ.

Эдгээр хүмүүс нь тавдугаар сарын 15-ны өдөр ОХУ-ын цэргийн онгоцоор ирсэн цэргийн сургуулийн оюутнууд юм.

Үүнийг сайн анхаарах хэрэгтэй. 18,19 хоногийн дараагийн давтан шинжилгээнээс вирус ийнхүү илэрлээ.

Алтанбулагийн боомтоор орж ирсэн 33 ачаа тээврийн жолоочийн шинжилгээнд коронавирус илрээгүй.

Ингээд нийт батлагдсан тохиолдлын тоо 185 боллоо. Үүнээс эдгэрсэн 44 хүн байгаа бол эмчлэгдэж байгаа нийт 141 хүн байна. Биеийн байдлын хувьд, 118 нь хөнгөн, 23 нь хүндэвтэр гэж үнэлэгдсэн байна.

Тандалт судалгаа, шинжилгээний ажил үргэлжилж байна. Өчигдөр гэхэд 370 гаруй хүний шинжилгээний сорьцыг цуглуулах нөр их ажлыг хийж дуусгалаа. 

Мөн өнөөдөр Истанбулийн онгоцоор ирсэн 179 хүний давтан шинжилгээг хийхээр сорьцыг цуглуулах ажилдаа орсон байна.

Иймд иргэд хамгийн гол нь анхаарлаа сулруулж болохгүй, гараа сайн угааж, амны хаалт заавал зүүх ёстой. Байнга ингэж сануулж байгаа ч үүнээс өөр хамгаалах арга байхгүй юм аа гэдгийг ойлгох хэрэгтэй. Бид коронавирусийн генийн дарааллын өөрчлөгдөх вий гэж өдөр бүр хянаж, нарийн судалж байна. Вакцин хийхэд генийн дараалал нь өөрчлөгдөхгүй байх нь их чухал. Хэрвээ өөрчлөгдөж, хувирах юм бол вакцин үйлдвэрлэхэд бэрхшээл тулгарах аюултай юм" гэв.