ЭМЯ-наас коронавируст халдварын нөхцөл байдлын талаар 11 цагийн ээлжит мэдээллээ хийж, ХӨСҮТ-ийн ерөнхий захирал Д.Нямхүү тусгаарлалтад байгаа болон тандалтын зорилгоор хийсэн коронавирусийн халдварын илрүүлэг шинжилгээний хариуны талаар мэдээлэл өглөө.

Д.Нямхүү: "Тавдугаар сарын 26-нд ХӨСҮТ болон Дархан-Уул аймаг дах гурван лабораторид нийт 248 хүнд шинжилгээ хийхэд 241 хүнээс коронавирус илрээгүй. Долоон хүнд коронавирус илэрлээ. Илэрсэн тохиолдлын зургаа нь тавдугаар сарын 26-нд Москва-Улаанбаатарын онгоцоор ирж ХӨСҮТ-д тусгаарлагдсан байсан оюутан. Мөн тавдугаар сарын 13-нд ирж тусгаарлагдсан байсан цэргийн сургуулийн нэг оюутны давтан шинжилгээнээс коронавирус илэрлээ. Эдгээр илэрсэн тохиолдол бүгд оюутнууд байна. Цэргийн ангийн сонсогчоос 14 дах хоногт коронавирус илэрсэн нь 21 хоног тусгаарлах схем маш зөв байгааг харуулж байна.

Сайн мэдээ байна. Өнөөдөр зургаан хүн эдгэрч, дараагийн шатны эмчилгээ рүү шилжлээ. Эдгээр эдгэрч гарч байгаа хүмүүст 14 хоногийн эмчилгээ хийгдсэн, цэргийн сургуулийн оюутнууд байна. Халдвар оюутнууд дунд их байна бас эд нар маань хурдан эдгэрч байгаа.

Ингээд монгол улсад батлагдсан тохиолдол 148 болж, эдгэрсэн тохиолдол 43 боллоо" гэлээ.