“Playtime” олон улсын хөгжмийн фестиваль дэлхийд тархаад байгаа "COVID-19" цар тахлын улмаас ирэх оны долдугаар сарын 16-ныг хүртэл хойшлогдохоор болжээ.
Анх 2002 оноос эхлэн зохион байгуулагдаж, жил бүр уламжлал болон болдог байсан тус наадам энэ жил 19 дэх удаагаа болох байсан юм.
Энэ талаар тус наадмыг зохион байгуулагчид өөрсдийн албан ёсны фэйсбүүк хуудсаар мэдэгдлээ.
Мэдэгдэлд "Дэлхий даяар "Covid-19"-ийн цар тахлын аюул улс оронд нэмэгдэж, олон нийтийн урлаг, соёлын арга хэмжээ, нийтийг хамарсан үйл ажиллагаа бүхий олон улсын хөгжмийн томоохон фестивалиуд хойшлогдоход хүрч хүндэрч тусч байна. Тийм учраас энэ жилийн наадмыг товыг бүтэн жилээр хойшлуулан, 2021 оны долдугаар сарын 16, 17, 18-нд зохион байгуулах боллоо. Учир нь Дэлхийн эрүүл мэндийн байгууллагаас Монгол Улсад халдвар тархах өндөр эрсдэлтэй болохыг байнга сануулж байгаа учраас Засгийн газраас авч хэрэгжүүлж байгаа шуурхай арга хэмжээг хэрэгжүүлж товоо хойшлуулахад хүрсэн" гэсэн байна.
Тус фестиваль хойшлогдсонтой холбогдуулан зохион байгуулагчид иргэдийн худалдан авсан тасалбар албан ёсоор 2021 онд шилжиж, хүчин төгөлдөр үйлчилнэ гэдгийг мөн мэдэгдлээ.
