Эрүүл мэндийн яамны ээлжит мэдээллийн үеэр дэлхийн улс орнууд коронавируст халдвараас сэргийлэх, тэмцэх чиглэлээр авч хэрэгжүүлж байгаа ажлуудын талаар ЭМЯ-ны Гадаад харилцаа, хамтын ажиллагааны хэлтсийн дарга Б.Янжмаа танилцуулав.
Дэлхийн хэмжээнд халдварын тохиолдол өндөрт тооцогдож буй орнуудад ОХУ, Америк, Бразил, Итали, Испани, Герман, Турк улс багтжээ. Одоогийн байдлаар ОХУ-д өнгөрсөн 24 цагийн хугацаанд 8800 гаруй шинэ тохиолдол бүртгэгдэн, нийт батлагдсан халдвартай хүний тоо 317000 гаруй болсон байна. Харин Бразил улсад 18500 гаруй шинэ тохиолдол бүртгэгдэж, нийт тохиолдлын тоо 310 мянга гаруй болсон байна. Мөн тус улсад нийт нас баралтын тоо 20 мянгыг даваад байна.
Б.Янжмаа мэдээллийн үеэр "Оксфордын их сургуулийн эрдэмтдийн ахалсан нэгэн томоохон судалгаа хийгдэж эхэлсэн бөгөөд уг судалгаа нь хумхаа өвчний эсрэг эмчилгээнд хэрэглэдэг эмнүүд COIVD-19 халдвараас урьдчилан сэргийлэхэд үр дүнтэй эсэхийг тогтоох зорилготой.
Өөрөөр хэлбэл, судалгааны үр дүнд дээрх эмүүд урьдчилан сэргийлэх боломжтой эсэхийг тогтооно.
Судалгаанд Европ, Ази, Африк, Өмнөд Америкийн орнууд дахь халдвартай хүмүүстэй тулж ажиллаж байгаа эмнэлгийн 40 гаруй мянган ажилчныг хамруулах бөгөөд судалгааны дүн 2020 оны төгсгөл гэхэд гарна гэсэн төлөвлөгөөтэй байгааг мэдээлсэн" гэсэн юм.
