ЭМЯ-наас коронавируст халдварын нөхцөл байдлын талаар 11 цагийн ээлжит мэдээллээ хийж, ХӨСҮТ-ийн ерөнхий захирал Д.Нямхүү тусгаарлалтад байгаа болон тандалтын зорилгоор хийсэн коронавирусийн халдварын илрүүлэг шинжилгээний хариуны талаар мэдээлэл өгөв.

Д.Нямхүү: "Та бүхэнд энэ өдрийн мэнд хүргэе. Өчигдөр ХӨСҮТ-ийн хоёр, Дархан-Уул аймаг дахь салбар лаборатори, Зооноз өвчин судлалын нэг лабораторид нийт 403 хүнд шинжилгээ хийлээ. Үүнээс нэг хүнд нь коронавирус илэрлээ. Энэ хүн нь энэ сарын 13-нд ОХУ-аас ирж, ХӨСҮТ-д тусгаарлагдаж байсан цэргийн оюутнаас илэрлээ. Ингээд нийт 57 сонсогчоод коронавирус илэрч байна. Халдвар судлалын талаас нь авч үзэхэд ойрхон хамт байсан хүмүүс нь их чухал гэдгийг харж, анхаарах хэрэгтэй. 

Тандалтын зорилгоор Интэрмед болон нийслэлийн дүүргийн эмнэлгүүдээс 13 хүний сорьц авч шинжилгээ хийсэн. Коронавирус илрээгүй. 

Сайн мэдээ байна. Өнөөдөр хоёр хүн эдгэж, ХӨСҮТ-ээс гарч дараагийн шатны сувилал, тусгаарлалт руу шилжиж байна. 

Ерөнхийд нь ажиглахад хүмүүсийн эмчлэгдэж байгаа хугацаа бол 30-40 хоног байна. Дээд тал нь одоогоор 55-56 хоносон байна. 

Өчигдөр баруун эргийн бүсэд хамаарагддаг 37 улс цахимаар хуралдаж, нөхцөл байдлын талаар ярилцлаа. Монгол улсыг маш сайн зохион байгуулалттай ажиллаж, арга хэмжээ авсан байна гэж дүгнэлээ. Ирэх долоо хоногт эрүүл мэндийн сайд сургалт орно" гэлээ. 

Ингээд монгол улсад зөөвөрлөгдөн орж ирж батлагдсан 141 тохиолдол бүртлэгдлээ. Үүнээс 28 хүн эдгэж эмнэлгээс гараад байна. 

Ажиглалтад гарсан нэг хүн халуурч, ХӨСҮТ-д хүргэгджээ

ЭМЯ-ны Тандалт, шуурхай удирдлагын хэлтсийн дарга Д.Нарангэрэл мөн дараах мэдээллийг өглөө. 

-"Манай улсад коронавирусийн халдвар зөөвөрлөгдөж орж ирсэн 141 тохиолдол бүртгэгдсэнээс 32 хүн нь эдгэрч эмнэлгээс гарсан. Өнөөдрийн байдлаар ХӨСҮТ-д 109 хүн эмчлэгдэж байна. Сүүлийн 24 цагт ажиглалтад нэг хүн нэмэгдэж орсон. Ингээд нийт 1,391 хүн ажиглалтад байна. Токио Ин буудалд ажиглалтад байсан нэг хүн халуурч, ХӨСҮТ-д өчигдөр орой шилжсэн .

ДЭМБ ээлжит хэвлэлийн хурлаа өчигдөр хийх үеэр архаг хууч өвчтэй хүмүүс, чихрийн шижинтэй хүмүүст онцгой анхаарахыг анхааруулсан" гэв.