ЭМЯ-наас коронавируст халдварын нөхцөл байдлын талаар 11 цагийн ээлжит мэдээллээ хийж, ХӨСҮТ-ийн ерөнхий захирал Д.Нямхүү коронавирусийн халдварын шинжилгээнд хамрагдсан хүмүүс болон ОХУ-аас ирсэн оюутнуудын талаар мэдээлэл өглөө.
Д.Нямхүү: "Та бүхэндээ энэ өдрийн мэнд хүргэе. Өчигдөр ХӨСҮТ-д нэг эмэгтэй амаржиж, охинтой боллоо. Энэ эхэд хоёр удаа илрүүлэг шинжилгээ хийсэн байсан. Хариу нь сөрөг гарсан.
ХӨСҮТ-ийн хоёр, Дархан-Уул аймаг дахь салбар лабораторид нийт 375 шинжилгээ хийсэн. Алтанбулгын боомтоор орж ирсэн 25 ачаа тээврийн жолоочооч коронавирус илрээгүй. ХӨСҮТ-д тусгаарлагдаж байсан 1 хүний давтан шинжилгээнд коронавирус илэрсэн. Мөн ОХУ-аас хүлээж авсан оюутнуудад шинжилгээ хийсэн. 18 хүнд коронавирус илэрлээ.
Бид тусгай үүргийн онгоцонд суух иргэдэд шинжилгээнд хамрагдах шаардлагатай гэж үзэж байгаа ч зарим улс орны нөхцөл байдлаас болж эх орондоо ирэх иргэд хамрагдаж чадахгүй байна.
Манай 21 хоног ажиглах, хянах тактик зөв байна гэж харж байна. Зарим хүнд 14 хоногийн дараа вирус илэрч байна" гэлээ.
