Эрүүл мэндийн яамны ээлжит мэдээллийн дараа ХӨСҮТ-ийн Тандалт, судалгааны албаны дарга А.Амбасэлмаа, ЭМЯ-ны хэлтсийн дарга Д.Нарангэрэл нар сэтгүүлчдийн асуултад хариуллаа.

А.Амбасэлмаа: 

-"БНСУ-руу хийсэн транзит нислэгээр ирсэн хүмүүсээс нэг тохиолдол илэрсэн талаар өмнө нь бид мэдээлсэн. Тус нислэгээр ирсэн хүмүүсийн ихэнх нь АНУ-аас ирсэн байна. Тавдугаар сарын 3-ны өдөр Франкфуртээс ирсэн хүмүүсээс шинжилгээ авч дууссан. Одоогоор 500 гаруй хүнд шинжилгээ хийгээд байна. Тавдугаар сарын 1-ний өдөр БНСУ-аас ирсэн 270 хүний шинжилгээг өнөөдөр авч эхэлж байна. Ингээд нийт 800 гаруй хүнд шинжилгээ хийгдэнэ гэсэн үг.

Тусгай үүргийн онгоцоор ирж байгаа зорчигчид эрүүл мэндийн шалтгаантай, нялх хүүхэдтэй, жирэмсэн эмэгтэйчүүд байна. Гадаадад эмчилгээ хийлгэж байсан хүмүүс зонхилж байна. Тэднийг Цэргийн төв эмнэлэгт тусгаарлаж байгаа.

ХӨСҮТ-д COVID-19 халдвартай, сэжигтэй хүмүүсийг тусгаарлаж, эмчилж байна. Тэр дунд давхар өвчтэй, хавдартай эсвэл жирэмсэн хүн байвал бид мэргэжлийн эмчийг нь дуудаж үзүүлж байна. Ингэхдээ халдвар хамгааллын дэглэмийг өндөр хэмжээнд сахиж байгаа. Удаан хугацаагаар тэнд байх боломжгүй эмч, мэргэжилтнүүдийг хамгаалах хэрэгсэлтэйгээр үзлэгийг нь хийлгэж, эмчилгээний зөвлөгөөг аваад буцааж байна.

Д.Нарангэрэл: 

-"Баар, үзвэр үйлчилгээний асуудлыг Эрүүл мэндийн яам шийддэггүй. Гэхдээ тэнд хүний бөөгнөрөл үүсч байгаа учраас олон эрсдэл гарч болно. Тийм ч учраас ЭМЯ-наас 10-аас дээш хүнийг нэг дор цуглуулахгүй, хоорондоо 1.5-2 метрийн зай барьж, халдвар хамгааллын дэглэмийг сайн мөрдөх гэсэн мэргэжлийн зөвлөмж, зөвлөгөөг байгууллагууд болон холбогдох албаныханд өгч байна. Тэдгээр газруудын үйл ажиллагаатай холбоотой шийдвэрийг нийслэлийн Засаг дарга гаргадаг" гэв.