ЭМЯ-наас шинэ төрлийн коронавируст халдварын нөхцөл байдлын талаар ээлжит мэдээллээ хийж, ХӨСҮТ-ийн ерөнхий захирал Д.Нямхүү ХӨСҮТ-д тусгаарлагдаж буй иргэдийн шинжилгээний хариу болон тусгай үүргийн нислэгээр ирсэн иргэдийн талаар мэдээлэл өглөө.

Д.Нямхүү: "Өдрийн мэнд хүргэе. Тавдугаарсарын 2-нд ХӨСҮТ болон Монгол орон даяар коронавирусийн сэжигтэй тохиолдол бүртгэгдээгүй. Дархан-Уул дахь салбар нэг, ХӨСҮТ-ийн хоёр, нийт гурван лабораторид 228 хүнд шинжилгээ хийсэн. Бүгдэнд нь коронавирус илрээгүй. Үүнд, ХӨСҮТ-д тусгаарлагдсан 6, бусад ажигдах байранд тусгаарлагдсан 155 хүний давтан шинжилгээ, тандалтын зорилгоор 33 хүний шинжилгээ багтсан. Тандалтын зорилгоор хийсэн 33 шинжилгээг бүгдийн Улаантбаатар хотоос түүвэрлэн авсан. 

Дархан-Уул аймгийн лабораторид Алтанбулгын боомтоор орж ирсэн 33 ачаа тээврийн жолоочид шинжилгээ хийсэн. Коронавирус илрээгүй.

Өнөөдөр өглөө Франкфурт чиглэлийн тусгай нислэг буусан, одоо ялган эрэмблэх ажиллагаа үргэлжилж байна. Нийт гурван чартерийн онгоцоор 800 гаруй иргэдээ авч ирсэн байна"  гэлээ. 

Мөн тэрээр Бельги улсаас гуравдугаар сард ирсэн иргэний талаар "Энэ иргэнийг Франкфурт чиглэлийн нислэгээр явуулаагүй. Ойрын хавьтлуудыг хамруулан шинжилгээ авсан. Коронавирус илрээгүй. Бид энэ иргэнийг үргэлжлүүлэн тандах нь зүйтэй. Энэ хүн өөрөө шинжилгээ өгөхийг хүссэн. Тэнд очоод шинжилгээнд хамрагдахад илэрвэл хэцүүд нь шүү дээ. Тэр өөрийгөө мэдэж байсан. 50 гаруй хоносон, ийм учраас аюулгүй гэж ойлгож болно. 

Бид Франкфурт чиглэлийн нислэгээр ирсэн хүмүүсдээ онцгой анхааран ажиллана. Учир нь маш хүнд газраас ирж байгаа.

ХӨСҮТ-ийн ачаалал нэмэгдсэн. Гэхдээ бид бүрэн тооцож авсан учраас иргэдээ хүлээн авсан, бэлэн байдал хангагдсан" гэсэн юм.