ЭМЯ-наас шинэ төрлийн коронавируст халдварын нөхцөл байдлын талаар ээлжит мэдээллээ хийж, ХӨСҮТ-ийн ерөнхий захирал Д.Нямхүү ХӨСҮТ-д тусгаарлагдаж буй иргэдийн шинжилгээний хариу болон транзит нислэгээр ирсэн иргэдийн талаар мэдээлэл өглөө.

Д.Нямхүү: "Та бүхэнд амралтын өдрийн мэнд хүргэе. Дөрөвдүгээр сарын 30-ны өдөр Сөүл-Улаанбаатар транзит нислэгээр ирсэн 281 иргэдэд шинжилгээ хийсэн. 280 хүнээс коронавирус илрээгүй. Нэг хүнээс илэрч бидний хяналтад орлоо. 

Нийт дөрвөн лабораторид 350 хүнд шинжилгээ хийсэн. Нэг коронавирус илэрсэн. /ХӨСҮТ-ийн 2 лаборатори, Дархан-Уул аймгийн нэг лаборатори, Зоонозын халдвар судлалын төвд нэг лаборатори нэмж байгуулсан/

Үүнд, ХӨСҮТ-д тусгаарлагдсан 25  хүний давтан шинжилгээ, Дархан-Уул аймагт тусгаарлагдсан 5 хүний давтан шинжилгээ, Баян-Өлгий аймагт тусгаарлагдсан 2 хүний давтан шинжилгээ, Замын-Үүд суманд тусгаарлагдсан 6 хүний давтан шинжилгээ, тандалтын зорилгоор 26 сорьцонд шинжилгээ хийсэн. 

Өчигдөр болсон асуудал дээр тайлбар өгье. Франкфурт руу нисэх гэж байсан иргэнд коронавирус илэрлээ, дотроо алдчихсан юм биш үү гэж хүмүүсийг айдаст автуулж байна. Энэ мэдээлэл хүмүүсийг амраасангүй. Буруу ташаа мэдээлэл өгч байгаа хүнд та бүхэн дургуйцэх хэрэгтэй. Шөнө амарч сайхан амрах нь хүний дархлааг дэмждэг. Бид өдөр бүр 11 цагт албан ёсоор баталгаатай мэдээлэл хүргэж байгаа. Бид эх орон, иргэдээ коронавируст халдвараас хамгаалж өдий хүртэл ажиллаж байхад ташаа мэдээлэл явуулсан. Үнэн бодитой мэдээлэл биднийг аварна.

Сайн мэдээ байна. Маш хүнд байсан Франц улсын иргэн өнөөдөр эх орон руугаа буцсан. Би өөрөө биечлэн гаргаж өгөөд ирлээ. Монгол улсад маш их талархаж байгаагаа илэрхийллээ. ХӨСҮТ-ийн Чинбаяр ахлагчтай эмч нарт талархаж байгаагаа илэрхийллээ" гэлээ.