Эрүүл мэндийн яамнаас коронавируст халдварын нөхцөл байдлын талаар ээлжит мэдээллээ хийлээ. Энэ үеэр ЭМЯ-ны Гадаад харилцаа, хамтын ажиллагааны хэлтсийн дарга Б.Янжмаа дэлхийн улс орны нөхцөл байдал, хийгдэж буй судалгааны талаар мэдээлэл өглөө.
Бразил, ОХУ, Сингапур улсад нөхцөл байдал хэвээр байгаа бөгөөд нас баралтын тоо буурахгүй байна. Харин Герман улсад PCR шинжилгээ авах хүчин чадлаа нэмэгдүүлжээ.
Б.Янжмаа: "Их Британид хийгдсэн судалгааны дүнг танилцуулъя. Судалгааг Эдинбургийн их сургууль, Ливерпулийн их сургууль, Лондоны Эзэн хааны коллежийн эрдэм шинжилгээний ажилтнууд удирдаж явуулсан байна.
Уг судалгаанд хоёрдугаар сарын 6-наас дөрөвдүгээр сарын 18-ны хооронд Их Британийн нийт 166 эмнэлэг, 16749 өвчтөнийг хамруулжээ.
Судалгаанд хамрагдсан өвчтөнүүдийн 49% нь эдгэрч эмнэлгээс гарсан бол 33% нь нас барж, 17% нь судалгааг дуусах үед үргэлжлүүлэн эмнэлэгт хэвтэн үргэлжлүүлэн эмчлүүлж байгаа юм байна.
Харин амьсгалын аппаратад орсон өвчтөнүүдийн хувьд 53% нь нас барж, 20% нь эдгэрч, 27% нь үргэлжлүүлэн эмчилгээ хийлгэж байжээ.
Судалгааны дүнгээс харахад уушги, зүрх, бөөрний архаг суурь өвчтэй байх нь коронавирусийн халдварын эрсдлийг нэмэгдүүлэхээс гадна эрэгтэйчүүд, мөн таргалалттай хүмүүс дунд нас баралт зонхилж байжээ.
Тарган хүмүүсийн уушгины үйл ажиллагаа буурч, арьсан доорх болон дотор эрхтний өөхний эд, эсэд үрэвсэл ихээр явагддаг тул хүний дархлааг бууруулж улмаар амь насанд илүү эрсдэл учруулах аюултай байж болзошгүй гэж дүгнэхэд хүргэсэн байна" гэлээ.