ЭМЯ-наас шинэ төрлийн коронавируст халдварын нөхцөл байдлын талаар ээлжит мэдээллээ хийж, ХӨСҮТ-ийн ерөнхий захирал Д.Нямхүү ХӨСҮТ-д тусгаарлагдаж буй иргэдийн шинжилгээний хариу болон тусгай үүргийн онгоцоор ирсэн иргэдийн талаар мэдээлэл өглөө.
Д.Нямхүү: "Та бүхэндээ энэ өдрийн мэнд хүргэе. Өчигдөр буюу дөрөвдүгээр сарын 30-нд монгол улсын хэмжээнд коронавируст халдварын сэжигтэй тохиолдол бүртгэгдээгүй. ХӨСҮТ болон Дархан-Уул аймгийн салбар лабораторид 217 сорьцонд шинжилгээ хийсэн. Коронавирус илрээгүй. Үүнд ХӨСҮТ-д тусгаарлагдсан 23 хүний давтан шинжилгээ, тандалтын зорилгоор цуцлуулсан 73 хүний сорьц /Дундговь, Төв аймаг, Нийслэлийн эмнэлгүүдээс цуглуулсан/, Алтанбулаг боомтоор орж ирсэн 23 жолооч, ажиглалтад байсан 99 хүний давтан шинжилгээ багтсан.
Өчигдөр эхний чартерийн онгоцоо хүлээн авлаа. Үүнээс 5 хүн ХӨСҮТ-д тусгаарлагдсан. Бусад нь бэлдсэн ажиглалтын байр луу хуваарьлагдсан. Өчигдөр хүмүүсээ нилээн орой байрлуулж дууссан байгаа. Өнөөдөр шинжилгээ авч эхэлнэ.
Ер нь бол аюул өнгөрөөгүй, аюул урд байна гэж үзэж байгаа. Бид дахиад хоёр онгоц хүлээн авах гэж байна. Франкфуртын онгоц бидний тооцоолж байгаагаар маш өндөр эрсдэлтэй. Урьдчилж тандан хянаж, төлөвлөж байгаа учраас ийн тооцоолж байгаа юм.
Ирэх онгоцууд дээрээ онцгой анхаарч ажиллах болно.
Тодорхой хугацаа өнгөрхөөр зүгээр байна гээд тайвширч болохгүй. Та бусдад мөн шаардлага тавих нь монгол улсаа хамгаалж байгаа гэсэн үг. Таны эрүүл мэнд таны гарт байгаа юм шүү. Тэвчээр хатуужилтай байж энэ өвчнийг даван туулна" гэлээ.
Мөн тэрээр "Бид цаг алдахгүй шинжилгээ авна. Бид тандалт хийж, ярилцсаны үндсэн дээр хэд хоноод шинжилгээгээ авах уу гээд явна. Өвчтөнүүдийн байдал өчигдөрийн янзандаа байгаа. Зарим хүний халуун бага зэрэг буурсан. Өвчтөний сэтгэл зүйн байдал маш чухал, мөн эмчдээ итгэх нь мөн чухал. Бид ямар эмчилгээ хийсэн гэдгээ тодорхой цаг хугацааны дараа нэгтгэж та бүхэндээ мэдээлнэ. Одоо бол цаг нь биш. Ямар эмчилгээ хийж байгаагаа нэгтгэнэ" гэсэн юм.