ЭМЯ-наас шинэ төрлийн коронавируст халдварын нөхцөл байдлын талаар ээлжит мэдээллээ хийлээ. Өнөөдрийн байдлаар коронавируст цар тахал дэлхийн 213 улсад бүртгэгдэж, нийт 3.2 сая хүн өвчлөөд байна. Халдварын улмаас 227 мянга гаруй хүн нас баржээ. Одоогоор уг өвчний улмаас 1.9 сая хүн эмнэлэгт хэвтэж эмчлүүлж байна.
ЭМЯ-ны хэлтсийн дарга Д.Нарангэрэл: “Манай улсад бүртгэгдсэн халдварын 38 тохиолдлоос одоогоор 10 хүн эдгэрээд байна.
Нэгдүгээр сарын 9-нөөс хойш бид улсын хэмжээнд 302 сэжигтэй тохиолдол бүртгэж, нийт 5.312 хүнийг ажиглалт авч тусгаарлаан хянажээ.
Өчигдөр тусгаарлалтаас нийт 284 хүн гарч, өнөөдрийн байдлаар нийт 486 хүн ажиглалтад байна.
Сүүлийн 24 цагийн дотор 119 зөвлөгөө өгөх утсанд 184 дуудлага ирсэн бөгөөд тус утсанд Япон, Швед улсаас манай улсын гурван иргэн холбогдож зөвлөгөө авахын зэрэгцээ Япон улсад халдвараас сэргийлэхээр хэрэгжүүлж буй арга хэмжээний талаар мэдээлсэн.
Иргэд гадуур явахдаа хүүхдэдээ амны хаалт зүүлгэхгүй байна гэсэн мэдээлэл ирсэн. Урин дулаан цаг ирж хүүхдээ гадаа тоглуулж байгаа ч амны хаалтыг нь тогтмол зүүлгэх ёстой. Мөн нэг саваар дамжуулан ус, ундаа ууж болохгүй. Энэ нь халдвар дамжуулах эрсдэл болно. Түүнчлэн тусдаа гар нүүрийн алчууртай байх, тусдаа аяга халбагтай байх хэрэгтэй.
ДЭМБ-аас болон ЭМЯ-наас өгч буй зөвлөмжийг уг өвчний эсрэг үр дүнтэй вакцин гартал хэрэгжүүлж, өөрийгөө эрсдлээс хамгаалахыг анхааруулж байна.
Дэлхийн дархлаажуулалтын долоо хоног тохиож байна. Гэвч COVID-19 халдварын улмаас дэлхийн дахинд 13 сая хүүхэд улаан бурхан, халдварт саа зэрэг өвчний вакциныг авч чадахгүй, вакцины хомстолд ороод байна. Тиймээс эдгээр өвчин дахин дэгдэх аюултай, тэр тусмаа улаан бурхан өвчин дэлхийн олон оронд дэгдэлт хэлбэрээр гараад байна.
Хүүхдээ товлолт вакцинжуулалтад заавал хамруулахыг зөвлөж байна” гэв.
Мөн тэрээр "Гадаадад байгаа монгол иргэд 119 дугаар руу өөрсдөө залгаж, байнгын зөвлөгөө авч байгаа. Дөрөвдүгээр сарын эхээр гадаадад халдвар авсан манай улсын 14 иргэн бүгд эдгэрч, хэвийн амьдралдаа эргэн орсон. Харин сүүлд халдвар авсан манай улсын таван иргэний хувьд, шинж тэмдэг хөнгөн, балархай байгаа учраас гэртээ тусгаарлагдан тухайн улсын эмчээс утсаар зөвлөгөө авах болоод ЭМЯ-ныхаа утсаар холбогдож зөвлөмж авах байдлаар эмчилгээ, үйлчилгээ авч байгаа" гэсэн юм.