ЭМЯ-наас шинэ төрлийн коронавируст халдварын нөхцөл байдлын талаар ээлжит мэдээллээ хийж, ХӨСҮТ-ийн ерөнхий захирал Д.Нямхүү ХӨСҮТ-д тусгаарлагдаж буй иргэдийн шинжилгээний хариу болон, ОХУ-аас ирсэн оюутнуудын талаар мэдээлэл өглөө.

Д.Нямхүү: "Өдрийн мэнд хүргэе. Дөрөвдүгээр сарын 29-нд буюу өчигдөр коронавирусийн халдварын сэжигтэй тохиолдол ХӨСҮТ болон улсын хэмжээнд бүртгэгдээгүй. ХӨСҮТ, Дархан-Уул аймгийн нийт гурван лабораторид 163 хүний сорьцод шинжилгээ хийсэн. Коронавирусийн халдвар илрээгүй.

Үүнд ХӨСҮТ-д тусгаарлагдсан 12, Дорноговь аймагт тусгаарлагдсан 31, Замын-Үүдэд тусгаарлагдсан 1 хүнд коронавирус илрээгүй. Тандалтын зорилгоор 46 хүний сорьцод шинжилгээнд коронавирусийн халдвар илрээгүй. Тандалтад Өвөрхөнгай аймаг болон Багануур дүүрэг зэрэг аймгуудаас цуглуулсан. Энэ нь улс оронд коронавирусийн халдвар байгаа эсэхийг тагнаж, мөрдөж байгаа юм.

Дархан-Уул аймгийн салбар лабораторид хийгдсэн Алтанбулагийн боомтоор орж ирсэн олон улсын ачаа тээврийн 31 жолооч, ажиглалтад байсан 43 хүний давтан шинжилгээнд коронавирусийн халдвар илрээгүй.

Өнөөдрийн байдлаар ХӨСҮТ-д 73 хүн байна. Бусдыг нь хоног өдрөөр нь хөөгөөд дараагийн шат руу шилжүүлж, ХӨСҮТ-д 150 орыг бэлдлээ. Одоо чартераар ирэх иргэдэд онцгой анхаарал хандуулж байна. 

ОХУ-аас ирсэн оюутнууд үндсэндээ 20-иод хоночихлоо. Заримд нь 3, зарим онцолж харсан хүмүүсдээ 4 удаа давтан шинжилгээ хийхэд коронавирусийн халдвар илрээгүй. Тийм учраас ОХУ-аас ирсэн оюутнуудын аюул дууссан гэж үзэж байна" гэлээ. 

Мөн тэрээр "Эмчлүүлж буй өвчтөнүүдийн хувьд хатгааны улмаас хэдэн өдөр дамжин халуурсан, гүйлгэж байгаа тохиолдлууд байна. Шинж тэмдгүүд заримд нь тод байгаа тул эмчилгээндээ онцгой анхаарч байна" гэсэн юм.