Эрүүл мэндийн яамны ээлжит мэдээллийн үеэр Эрүүл мэндийн тусламж үйлчилгээний талаар Я.Буянжаргал танилцуулга хийлээ.
ЭМЯ-ны Эмнэлгийн тусламжийн газрын дарга Я.Буянжаргал: "Өнөөдрийн байдлаар эмнэлгийн тусламж үйлчилгээ хэвийн явагдаж байна. Өчигдөр орой Замын-Үүдийн хилийн боомтоор БНХАУ-ын Хөх хотод эмчлүүлж байсан биеийн байдал нь хүнд иргэнээ хүлээж авсан. Замын-Үүдийн нэгдсэн эмнэлэгт тусгаарлан, ажиглаж байна. Вируслогийн шинжилгээг нь ХӨСҮТ рүү илгээж, Улсын Нэгдүгээр төв эмнэлэг, ГССҮТ-ийн мэргэжлийн эмч нараас зөвлөгөө авсан.
Эмнэлгийн тусламж үйлчилгээний хувьд ДЭМБ-аас өгч буй илрүүл, оношил, тусгаарла, эмчил гэсэн зөвлөмжийн дагуу бид ажиллаж байгаа. Тусгай үүргийн онгоцыг хүлээж авах нислэгийн багт ажиллах эмчийг томилсон. Мөн эрүүл мэндийн байгууллагууд, тусгаарлах байруудын бэлэн байдлыг хангаж, тэнд ажиллах эмч, эмнэлгийн мэргэжилтнүүдээ томилж, дадлагажуулсан.
Дадлага сургуулилтыг урьдчилсан байдлаар тавдугаар сарын эхний долоо хоногт хийх төлөвлөгөөтэй байна. Хээрийн эмнэлгийг дэлгэн ажиллуулах бэлтгэлийг хангасан. Нийт 30-50 орчим хүнийг тусгаарлан эмчилгээ тусламж үзүүлэх боломжтой гэж тооцоолсон.
Эрүүл мэндийн салбарын хүний нөөцийн хувьд 2019 оны эцсийн байдлаар нийт 54 687 эмч, эмнэлгийн мэргэжилтэн, эрүүл мэндийн ажилтан ажиллаж байна. Үүнээс, сувилагч 12 773, эмч 11 788 байна. Эрүүл мэндийн салбарт 92.5 нь, бусад салбарт үлдсэн 7.5 хувь нь ажиллаж байна. Хэрэв цар тахал хүн амын дунд тархсан тохиолдолд ажиллах бүх томилгоог хийсэн бөгөөд үүнтэй холбоотой дадлагажуулах сургалт, үнэлгээ хийж байгаа.
Одоогийн байдлаар эрүүл мэндийн салбарт тасарсан эм, эмнэлгийн хэрэгсэл байхгүй. Шаардлагатай эм, эмнэлгийн эм, хэрэгслийг урьдчилсан байдлаар УОК, МИАТ зэрэг холбогдох байгууллагад хүсэлт тавьж, тусгай үүргийн онгоцоор татаж авах ажил хийж байгаа" гэлээ.