ЭМЯ-наас шинэ төрлийн коронавируст халдварын нөхцөл байдлын талаар ээлжит мэдээллээ хийлээ. 

ЭМЯ-ны хэлтсийн дарга Д.Нарангэрэл: “Мэдээлэл өгсөнөөс хойш сүүлийн 24 цагийн дотор коронавирусийн халдвар 213 улсад бүртгэгдэж, нийт 2.9 сая хүнд халдвар тархаж, 203 мянган нас барсан байна. 830 мянга гаруй хүн эдгэрч, эмнэлгээс гарч, 1.9 сая хүн эмнэлгийн байгууллагуудад эмчлэгдэж байна.

Сүүлийн 24 цагийн дотор ОХУ-ын 54 бүс нутагт халдвар бүртгэгдэж, 5966 шинэ тохиолдол илэрлээ. Нийт тохиолдол 74 мянга болсон байна. Нас баралт өнгөрсөн хоногт 66-гаар нэмэгдсэн нь хамгийн өндөр үзүүлэлт болжээ.

ОХУ-д өвчлөл нэмэгдэж байгаа нь хатуу хөл хорионы дэглэм мөрдөгдөж чадахгүй, иргэд дулааны улирал ирсэнтэй холбоотойгоор гадуур их явах, мөн улирлын томуугийн шинж тэмдэгтэй андуурч өвчнөө гэрээр хүндрүүлж байна.

Өвчлөлийн тохиолдлын 50 орчим хувь нь шинж тэмдэггүй байгаа нь иргэд эмнэлгийн байгуулагад хандахгүй байхад нөлөөлж байна гэж үзжээ. Москвагаас гадна Эрхүү, Буриад, Халимагт халдварын тохиолдол нэмэгдэж байна.

Манай улсын хувьд 743 хүн ажиглалтад байна. 

Монголд 119 дугаартай утас 24 цагаар ажиллаж байгаа. Гадаадын зургаан улсаас монгол иргэд зөвлөгөө авсан. Үүнд, ОХУ, Малайз, Энэтхэг, АНУ, Солонгос зэрэг улсаас зөвөлгөө авсан. Монгол улсын нэг иргэн нэмж коронавирусийн халдвар эерэг гарсан байна. Гэхдээ тухайн иргэний шинж тэмдэг хөнгөн хэлбэртэй байгаа тул гэрийн тусгаарлалтад байгаа гэсэн мэдээлэл өгсөн. Манай мэргэжлийн эмч нар зөвөлгөө өгч байгаа" гэлээ.