ЭМЯ-наас шинэ төрлийн коронавируст халдварын нөхцөл байдлын талаар ээлжит мэдээллээ хийж, ХӨСҮТ-ийн ерөнхий захирал Д.Нямхүү ХӨСҮТ-ийн мэдээллийг танилцуулав.
Тэрээр "Өдрийн мэнд. Дөрөвдүгээр сарын 23-ны байдлаар Алтанбулаг боомтоор орж ирсэн 47 жолооч, мөн Сэлэнгэ аймагт тусгаарлагдсан 2 хүн, нийлээд 49 хүний шинжилгээг Дархан-Уул аймаг дахь лабораторид хийсэн. Коронавирус илрээгүй. Энэ лабораторид ХӨСҮТ-ийн мэргэжилтэн ажиллаж байгаа. Тэнд шинжилгээ, хяналтын ажлыг байнга хийнэ.
Тандалтын зорилгоор уушигны хатгаагаар өвдсөн 29 хүнд шинжилгээ хийхэд коронавирус илрээгүй. Үүнд УНТЭ, Хоёрдугаар эмнэлэг, нийслэлийн таван дүүргээс сорьцуудыг цуглуулсан.
Сайн мэдээ байна. Турк улсын нэг иргэн эдгэрч эмнэлгээс гарч, гэрийн хяналтад шилжлээ.
ХӨСҮТ-д тусгаарласан хүмүүсд давтан шинжилгээ хийхэд коронавирусийн нэг тохиолдол бүртгэгдлээ. Энэ нь Москвад сурч байсан оюутнаас илэрсэн.
Бидний хяналтын тактик зөв байна гэж дүгнэж байгаа. Хяналтад 13 хоносон, оюутнаас илэрсэн. Хяналтын хугацаанд хэрхэн давтан шинжилгээ хийх вэ гээд бид туршлагажиж байна.
21 хоногийн тусгаарлалт чухал үүрэг гүйцэтгэж байна. Иргэд мөн үүнд өндөр анхаарах хэрэгтэй" гэв.
Монгол улсад коронавирусийн 36 дахь тохиолдол бүртгэгдэж, үүнээс 8 хүн эдгэрч, эмнэлгээс гарлаа.
