Эрүүл мэндийн яамнаас коронавируст цар тахлын нөхцөл байдлын талаар ээлжит мэдээллээ хийлээ.

Эрүүл мэндийн яамны Нийгмийн эрүүл мэндийн хэлтсийн дарга Д.Нарангэрэл: Дэлхийн 213 улс орон, нутагт коронавирусийн халдвар бүртгэгдсэн. 2.6 сая өвчилж, 184 мянган хүн нас барж, 700 мянга гаруй хүн эдгэрч, 1.7 сая хүн эмчлэгдэж байна. 

ОХУ-д 58 мянга гаруй хүн өвчилж, өвчлөлийн тархалт эрчимтэй байна. Манай улстай хил залгаа Эрхүү мужид 75, Буриадад 153, Алтайд 58, Тувад 13 хүн өвчилсөн байна. Өвчлөл хөнгөн балархай хэлбэрт байгаа тул нян тээгчээс халдвар тархах эрсдэл их байна. 

ОХУ-ын эрдэмтэдийн судалгаагаар хүүхэд балархай хэлбэрээр өвчилж, удаан хугацаагаар тээж байгаа тул хүүхэд халдвар түгээх эх уурхай болж байна гэж дүгнэсэн.

БНХАУ-ын эрдэмтэд коронавирусийн өвчлөлд 30 омог байна гэж үзсэн. Хамгийн их нас баралтыг үүсгэдэг омог нь Европ, АНУ-ын New York хотод тархсан байна. Мөн энэ вирус 19 хувьсал, өөрчлөлтөд орсон гэсэн судалгааг хийсэн. Ийм учраас коронавирус маш эрчтэй тархаж, хувьсан өөрчлөгдөж байгаа тул яг өөрт нь тохирсон эм, эсрэг вакцин гаргахад нилээд хүндрэлтэй болж болзошгүйг анхааруулсан байна. 

Манай улсын хэмжээнд ажиглалтад 1249 хүн байна. Үүнээс 36 хүн шинээр ажиглалтад орж, 9 хүн тусгаарлалтаас гарсан. Эмнэлгийн үйл ажиллагаа хэвийн явагдаж байна. 

Манай улсад амьсгалын 472 аппарат ажиллаж байна. Дээр нь 72 аппаратыг шинээр авсан. Дахиад 426 амьсгалын аппарат шинээр авна" гэлээ.