Эрүүл мэндийн яамнаас коронавируст халдварын нөхцөл байдлын талаар ээлжит мэдээллээ хийлээ. ХӨСҮТ-ийн хоёр лабораторид өчигдөр нийт 341 хүнд шинжилгээ хийсэн бөгөөд коронавирус илрээгүй байна.
ХӨСҮТ-ийн ерөнхий захирал Д.Нямхүү: "Дөрөвдүгээр сарын 20-нд буюу өчигдөр ХӨСҮТ-ийн 341 хүний шинжилгээ хийсэн. Тандалтын 11 сорьц, ХӨСҮТ-д тусгаарлагдсан 13 хүний давтан шинжилгээ болон эдгээр 341 хүнд коронавирус илрээгүй.
Нийт 154 хүнд эмчилгээ, хяналт, тандалт судалгаа хийгдэж байна. Өнөө өглөө 05:00 цагт Интермед эмнэлгээс нэг сорьц авчирч шинжилгээ хийж байна. 69 настай иргэн 2 уушгиндаа хатгаатай, иргэнд тус эмнэлгийнхэн түргэвчилсэн оношлуураар шинжилгээ хийхэд ЭЕРЭГ гарсан. Шинжилгээг баталгаажуулахаар PCR шинжилгээг ХӨСҮТ-д хийж байна. Гайгүй байх гэж бодож байна. Тухайн иргэний хүүхэд 1 дүгээр сарын 7-ноос 2 дугаар сарын 7-нд Солонгост байж байгаад ирсэн. Үдээс хойш шинжилгээний хариу гарна. Одоо тухайн иргэн болон ойрын хавьтал буюу эмнэлэгт хүргэж ирсэн 3 хүний хамт тусгаарласан байгаа. Мөн "Интермед" эмнэлэгт зааварчилгаа өгөн ажиллаж байна" гэлээ.