Эрүүл мэндийн яамнаас коронавируст халдварын нөхцөл байдлын талаар ээлжит мэдээллээ хийлээ.
ХӨСҮТ-ийн ерөнхий захирал Д.Нямхүү: Өдрийн мэнд. Дөрөвдүгээр сарын 15-ны байдлаар ХӨСҮТ болон Монгол улсын хэмжээнд коронавируст халдварын сэжигтэй тохиолдол бүртгэгдээгүй.
Өчигдөр ХӨСҮТ-ийн лабораторид 84 шинжилгээ хийлээ. Үүнд Сэлэнгэ аймгийн Алтанбулаг боомтод хяналт, тандалтаар ажиллаад ирсэн эмч, мэргэжилтэнгүүд, мөн тээврийн жолооч 44 хүн, тандалтын зорилгоор цуглуулсан 25 сорьц, ХӨСҮТ-д тусгаарлагдсан 4 хүний давтан шинжилгээ хийсэн. Коронавирус илрээгүй.
Харин ОХУ-аас ирж "Амар" зочид буулалд тусгаарлагдсан 11 хүнд шинжилгээ хийсэн. Үүнээс нэгд нь коронавирусийн халдвар илэрлээ.
Ингээд Монгол улсын хэмжээнд батлагдсан нийт 31 тохиолдол бүртгэгдлээ.
Үүнээс 5 хүн нь эдгэд, эмнэлгээс гарсан. Үргэлжлэн хяналтад байгаа.
Өнөөдрийн байдлаар ХӨСҮТ-д 245 хүн тусгаарлагдан, хяналт тандалт үргэлжилж байна.
"Сонгдо" эмнэлгийн хоёр тохиолдолд эсрэг бие илрүүлэг шинжилгээ хийсэн, эсрэг бие илрээгүй. Өөрөөр хэлвэл коронавирусийн халдвараар өвчлөөгүй гэсэн үг.
Харин эдгэсэн 5 хүний тохиолдолд шинжилгээ хийхэд эсрэг бие илэрсэн. Бид бусад орны адил хяналт, судалгаа хийж байна" гэлээ.
