Эрүүл мэндийн яамнаас коронавируст халдварын нөхцөл байдлын талаар ээлжит мэдээллээ хийлээ. Энэ үеэр ЭМЯ-ны Гадаад харилцаа, хамтын ажиллагааны хэлтсийн дарга Б.Янжмаа дэлхийн улс орны нөхцөл байдал болон коронавирусийн эсрэг вакцин хийгдэж байгаа талаар мэдээлэл өглөө.

Тэрээр "Иран улсад өнгөрсөн 24 цагийн хугацаанд 98 нас баралт шинээр бүртгэгдсэн нь сүүлийн нэг сарын хугацаан дахь хамгийн бага үзүүлэлт юм.

Итали улсад нас баралт өмнөх өдрөөсөө өсөж, шинэ халдварын тоо ялимгүй буурчээ.

БНСУ-д коронавирусээр өвчилж эдгэрсэн гэх өвчтөнүүдэд вирус халдвар дахин илэрч байгаа тохиолдлууд нэмэгдэж байна. Мягмар гаригийн байдлаар ийм тохиолдол 124-д хүрчээ. Судалгаа хийсний дараа мэргэжилтнүүд эдгэрсэн өвчтөнүүдэд вирус дахин илэрч байгааг тайлбарлахдаа нуугдмал байсан вирус өвчтөнүүдийн биеийн дархлаа сул болох үед дахин идэвхжсэн байж болзошгүй. Эсвэл шинжилгээний хариунд алдаа гарсан байхыг үгүйсгэхгүй гэж мэдэгдсэн байна. Тус улсын өвчний няналт сэргийлэлтийн төвөөс вирус мутацид орж байгаа эсэхийг судалж байгаа талаар мэдээлэлд дурьдсан байна. 

БНСУ-д ийм төрлийн тохиолдол анх 2 дугаар сарын 27-нд бүртгэгдсэн. Түүнээс хойш нэмэгдсээр байна.

Одоогийн байдлаар халдвар авч эдгэрсэн гэх дээрх өвчтөнүүдээс хоёрдогч халдварыг тараасан тохиолдол БНСУ-д бүртгэгдээгүй байна гэж мэдээлсэн байна. Үүнтэй холбогдуулаад эдгэрсэн өвчтөнүүдийг карантинаас гаргаснаас хойш дахин 2 долоо хоног гэрийн тусгаарлалтад оруулна гэж мэдэгджээ.

ДЭМБ-аас даваа гаригт мэдээлэл өгөх үеэрээ шинэ коронавирусийн халдвар авч эдгэрсэн хүмүүс дархлаатай болохгүй буюу халдварын эсрэг тэмцэх эсрэг биеттэй болохгүй байгаа талаар тэмдэглэж хэлсэн байна.

НҮБ-аас Африкийн улсуудад зориулж нийт 30,000 хүнийг эмчлэхэд шаардлагатай эм, эмнэлгийн хэрэгсэл, хамгаалах хэрэгсэл, эмнэлгийн тоног төхөөрөмжийг хүргүүлсэн байна" гэв.