Эрүүл мэндийн яамнаас коронавируст халдварын нөхцөл байдлын талаар ээлжит мэдээллээ хийв. Өнөөдөр тусгаарлагдаж байсан иргэдээс коронавирусийн 13 шинэ тохиолдол бүртгэгдэж, монгол улсад батлагдсан 30 тохиолдол бүртгэгдэв. Харин 5 иргэн эдгэж, эмнэлгээс гарлаа.  

Шинээр бүртгэгдсэн тохиолдлуудын талаар ХӨСҮТ-ийн Тандалт судалгааны албаны дарга А.Амбасэлмаа мэдээлэл өгөв. 

Тэрээр "ОХУ-аас ирсэн сэжигтэй 20 хүнийг өчигдөр тусгаарлаж шинжилгээ хийсэн. Үүнээс нэг тохиолдол батлагдсан. Тухайн батлагдсан тохиолдлын ойрын хавьтал болох 31 хүнээс шинжилгээ авахад 13-аас нь коронавирус илэрсэн.

ОХУ-аас ирж байгаа 282 хүн бол Москвагаас Улаан-Үдэ рүү нислэгээр ирсэн, Эрхүүгээс Улаан-Үдэ рүү автобусаар ирсэн, тэгээд хилээр нэвтэрсэн хүмүүс байгаа. Москва хотоос Улаан-Үдэ рүү ирсэн зорчигчдыг бид Амар зочид буудалд тусгаарласан.

Сүүлд батлагдсан тохиолдлын ойрын хавьтал нь Москва хотод сурч байсан хүмүүс учраас бид тэндээс ирсэн 31 оюутныг ойрын хавьтал гэж үзэж шинжилгээ авсан. Үүнээс 13 хүн өөрсдөө ойрын хавьтал бөгөөд дээрх 31 хүн дотор орсон гэсэн үг. Цаашид бид тэдэнд шинжилгээгээ үргэлжлүүлэн хийнэ.

Тэдний биеийн байдал харьцангуй гайгүй байна. Сүүлийн тохиолдлуудын зарим нь шинж тэмдэггүй байгаа бол дөрвөн хүүхдэд нь 2-3 шинж тэмдэг илэрсэн. Насны хувьд 19-23 насны хүүхдүүд байгаа. 

Энэ нь халдварыг нууц үеийн төгсгөлд илрүүлж, өвчин хүндэрч, уушгины хатгаа болохоос нь өмнө аварч чадсан үг.

Дархан-Уул аймагт бүртгэгдсэн нэг тохиолдол нь Москвагийн Төмөр замын дээд сургуулийн оюутан. Тус улсаас ирсэн тохиолдлуудын мэдээллээр тухайн сургуульд өвчлөл бүртгэгдсэн байна.

ОХУ-аас эдгээр тохиолдолтой хамт хилээр орж ирсэн 111 хүн Дархан-Уул аймагт тусгаарлагдсан бөгөөд мөн ялгаагүй нэг, нэгээр нь тусгаарласан.

Бид халдвартын бэлтгэгдсэн клиникийн хоёр том байшинд тусгаарлалт, ажиглалт болон батлагдсан, сэжигтэй тохиолдлуудыг хянаж, эмчилж байгаа.

Манай эмч нар ээлжээр ажиллахад бэлэн байгаа бөгөөд зохицуулалт хийнэ. Одоогоор манай ХӨСҮТ-ийн эмч нар эмчлэх бүрэн чадамжтай.

Монгол Улс эрсдлийн үнэлгээг нийт зургаан удаа хийсэн. Бид өнөөдөр дахин эрсдлийн үнэлгээ хийнэ. 

Өмнө нь Монгол Улсад халдвар орж ирэх магадлал маш өндөр байсан бол өвчлөл бүртгэгдсэнээс хойш одоо ч халдвар тархах эрсдэл нь мөн маш өндөр байгаа. Тиймээс хүн бүр эрүүл мэндийн байгууллагаас өгч буй зөвлөгөөг дагах нь чухал.

Одоогийн байдлаар манай улсад бүртгэгдсэн 30 тохиолдол бүгд гаднаас зөөвөрлөгдөн орж ирсэн ч энэ халдварын голомт дэлхий дахинаа идэвхтэй байсаар байна" гэсэн мэдээлэл өгөв.