Эрүүл мэндийн яамнаас коронавируст халдварын нөхцөл байдлын талаар ээлжит мэдээллээ хийлээ. 

ЭМЯ-ны хэлтсийн дарга Д.Нарангэрэл: "Дэлхийн 212 улсад өвчлөл бүртгэгдсэн хэвээр байна. Өнөөдрийн байдлаар 1.603.719 хүн коронавирусаар өвчилж, 85.722 хүн нас бараад байна.

АНУ, Итали, Их Британи, Швейцарь, Герман, Франц, Иран, Турк улсад өвчлөл эрчтэй тархалт үргэлжилсээн байна. Судлаачдын үзэснээр энэ эрчтэй тархалт дөрөв, тавдугаар сард үргэлжлэхээр байгааг мэдээллээ.

Япон, Солонгост тархалт идэвхтэй хэвээр байна. Ялангуяа Япон улсад халдвар их байгааг эмнэлгээс шалтгаалсан буюу өвчтэй хүнээ үзүүлэхээр эмнэлэгт очсон хүмүүс халдвар авч, өвчлөл тарааж байгаа хэмээн үзсэн байна. Өвдсөн нэг хүнийг 3, 4 хүн дагаж ирдэгтэй холбоотой.

Манай орны хувьд ч иргэд эмнэлэгт ирэх нь нэмэгдэж байгаа. Нэг хүнийг үзүүлэхээр олуулаа эмнэлэгт очих, эргэлтээр мөн хүмүүс ирэх тохиодол түгээмэл байна. Улсын Гуравдугаар төв эмнэлэгт ажиглалт хийж үзэхэд шинжилгээ өгөхөөр ирж байгаа нэг хүнийг дагаж 8-10 хүн ирдэг юм байна. Энэ бол өвчлөл тархах эрсдэл юм.

ДЭМБ-аас хүний бөөгнөрөл үүсэх нь халдвар тархах шалтгаан болж байгааг мэдээлсээр байна.

Тухайлбал, Израйл улсад нэг машинд 2-оос дээш хүн хамт зорчихыг хориглож, үйлчилгээний газруудад хоёр метрийн зайтай үйлчлүүлэх хатуу дэглэм тогтоосон бөгөөд энэ дэглэм 90 хоног үргэлжлэх юм байна.

Мөн Австрали улсад хоёроос дээш хүн шалтгаангүй цугларвал 11,000 австрали доллароор торгохоор болсон байна. Хатуу хөл хорионы дэглэм дэлхийн улс орнуудад мөрдөгдөж, түүнийг 60-90 хоногоор сунгасаар байна.

Турк улсад иргэдээ аль болох гэрээсээ гарахгүй байхыг зөвлөж байгаа. Тус улсад байгаа гадны иргэдийг үнэ төлбөргүй шинжилгээнд хамруулж эхэлсэн таатай мэдээ байна. 

БНХАУ-ын эрдэмтдийн гаргасан нэг судалгаагаар халдварын тархалтад тухайн улс үндэстний онцлог хамаарахгүйг онцолсон. Мөн хөл хорионы дэглэмээ хэр зэрэг барьж байгаагаас халдварын тархалт хамаарч байгааг дурдсан байна" гэлээ.