Эрүүл мэндийн яамнаас коронавируст халдварын нөхцөл байдлын талаар ээлжит мэдээллээ хийлээ. Энэ үеэр ХӨСҮТ-ийн Тандалт судалгааны албаны дарга А.Амбасэлмаа манай улсад бүртгэгдсэн 16 дахь тохиолдлын ойрын хавьтлууд болон хяналтын талаар мэдээлэл өглөө. 

Тэрээр "Өчигдөрийн 16 дахь батлагдсан тохиолдол болсон иргэний сурч байсан газарт өвчлөл гарчихсан байсан учраас бид ганцааранг нь тусгаарласан байсан. Мөн хамт байсан хүмүүсийг нэг нэгээр нь Сэлэнгэ аймгийн эрүүл мэндийн бэлдсэн байранд тусгаарласан. Гуравдугаар сарын 26-нд ирсэн тэдгээр иргэдээс 27-нд эхний шинжилгээ авахад хариу сөрөг гарсан. Ингээд дөрөвдүгээр сарын 6-нд давтан шинжилгээ авахад хариу нь эерэг гарсан юм.

Энэ иргэн тухайн газраасаа халдвар авч ирсэн, дотроосоо алдсан зүйл байхгүй. Ирсэн цагаасаа ганцаараа тусгаарлагдаж байсан учраас ингэж үзэж байна. Тухайн иргэнтэй машинд хамт явж ирсэн гурав, бусад байдлаар ойр харилцсан 11 хүнийг тогтоогоод тусгаарласан. Тэднээс шинжилгээ авч байгаа. Мөн нэгдүгээр хавьтлын хавьтал 100 гаруй хүнээс шинжилгээ авч байна. Шинжилгээний хариу маргааш гарна. 

Бид вирус ялгарах хугацааг тодорхой хугацаагаар хянаад шинжилгээ давтан хийгээд байгаа юм. Тиймээс давтан шинжилгээгээр вирус илэрсэн.

Гуравдугаар сарын 28-нд хойд хилээ хаасан. Хил хаахаас өмнө ирсэн хүмүүсийг бид 14 хоног чек листээр хянаад өөрчлөлт гарсан тохиолдолд шинжилж байсан.

Харин халдвартай тохиолдол гарснаас хойш бүх хавьтлыг шинжилж байгаа. Халдвар судлалын заалтаар хавьтлуудыг 2-3 удаа шинжилж байгаа" гэлээ.