Манай улсад коронавирусийн 16 дахь тохиолдол бүртгэгдлээ. Шинээр бүртгэгдсэн нэг тохиолдол нь Хойд хилээр гуравдугаар сарын 26-27-нд шилжих шөнө орж ирсэн бөгөөд тухайн иргэний давтан шинжилгээнээс коронавирус илэрсэн байна. 

ХӨСҮТ-ийн захирал Д.Нямхүү "Бид дэлхийн эрүүл мэндийн байгууллагаас зөвлөж байгаа тусгаарлалтын хоногуудыг дагаж мөрдөж байна. 14 хоног байсныг сунгаж 21 хоног болгосон нь ийм учиртай. Нууц үеийн хугацаа гэж байгаа. Үүнийг судалж, тооцоолж эдгээр хоногуудыг гаргасан. Тусгаарлалтын арга хэмжээ, системтэй хяналтыг сайн хийх хэрэгтэй. Энэ маш чухал. Хувь хүмүүс өөрсдийгөө үнэнч шударгаар хянаж, өөрийн биед гарч буй өөрчлөлтүүдийг тэмдэглэх нь зүйтэй юм. 

Мөн иргэд бусдыгаа мөн хянах хэрэгтэй. Сүүлийн өдрүүдэд иргэд маск зүүх нь багасаж байна. Дулаарсантай холбоотой хүүхдүүд гадуур тоглох нь ихсэж байна. Бид анхаарлаа сулруулах л юм бол өнгөрсөн гурван сарын амжилтыг хоромхон хугацаанд алдах эрсдэлтэй. Бие, биенээ хянаж, шаардлага тависнаар бид энэ хүнд нөхцөл байдлыг давж гарч чадна. 

Нэг хүний алдаанаас болж хичнээн хүн хохирч байгааг бид дэлхийн улс орны жишээнүүдээс харж байна. 

Бид өнөөдөр шинээр мэдэж буй мэт соргог байж, хяналтаа үргэлжлүүлэх хэрэгтэй. Бусад орны мэдээллээс бид аюулт нөхцөл байдлыг мэдэж авч, энэ хүнд үеийг даван гарна. Энэ өвчлөл хэр их хугацаанд үргэлжлэхийг мэдэхгүй ч энэ цаг үеийг тэвчээртэй өнгөрөөж чадвал монгол хүний үнэ хүнд дэлхий дахинаа үнэлэгдэх болно. Ийм учраас энэ нөхцөл байдлыг эрүүл мэнд талаас нь харж, гэр бүл, хайртай хүмүүсээ хамгаалж улам соргог байхыг анхааруулж байна" гэсэн юм. 

Монгол улсад коронавирусийн бүртгэгдсэн тохиолдлууд:

• Гуравдугаар сарын 10-нд Монгол улсад ирсэн Францын иргэний шинжилгээнээс коронавирус илэрч анхны тохиолдол бүртгэгдсэн.

• Гуравдугаар сарын 16-нд Сөүл-Улаанбаатар, Берлин-Москва-Улаанбаатар чиглэлийн тусгай үүргийн онгоцоор ирсэн гурван иргэнээс коронавирус илэрсэн нь лабораторийн шинжилгээгээр батлагдсан.

• Гуравдугаар сарын 16-нд Берлин-Москва-Улаанбаатар чиглэлийн тусгай үүргийн онгоцоор ирсэн дахин нэг иргэнээс коронавирусийн илэрсэн.

• Гуравдугаар сарын 18-нд Берлин-Москва-Улаанбаатар чиглэлийн тусгай үүргийн онгоцоор ирсэн иргэнээс түргэвчилсэн оношлуураар шинжилгээ хийхэд халдвар илэрсэн.

• Гуравдугаар сарын 16-нд Берлин-Москва-Улаанбаатар чиглэлийн тусгай үүргийн онгоцоор ирсэн дөрвөн иргэнээс коронавирус илэрсэн. 

• Гуравдугаар сарын 26-нд Истанбул-Улаанбаатар чиглэлийн тусгай үүргийн онгоцоор ирсэн нэг монгол иргэнээс коронавирусийн халдвар илэрсэн.

• Гуравдугаар сарын 28-нд Истанбул-Улаанбаатар чиглэлийн тусгай үүргийн онгоцоор ирсэн нэг иргэний давтан шинжилгээнээс коронавирус илэрсэн.

• Дөрөвдүгээр сарын 1-нд ХӨСҮТ-д тусгаарлагдан хянагдаж байсан Туркийн хоёр иргэнээс коронавирус илэрсэн.

• Дөрөвдүгээр сарын 6-нд ХӨСҮТ-д тусгаарлагдан, хянагдаж байсан Туркийн нэг иргэний давтан шинжилгээнээс коронавирус илэрсэн. 

• Дөрөвдүгээр сарын 8-нд Сэлэнгэ аймагт тусгаарлагдаж байсан нэг монгол иргэний давтан шинжилгээнээс коронавирус илэрсэн. 

Өнөөдрийн байдлаар Монгол улсын хэмжээнд бүртгэгдсэн коронавирусийн халдварт өвчний 16 тохиолдлын дөрөв нь эдгэрч эмнэлгээс гараад байна.