Эрүүл мэндийн яамнаас коронавирусийн нөхцөл байдлын талаар ээлжит мэдээллээ хийлээ.
ХӨСҮТ-ийн захирал Д.Нямхүү: Өдрийн мэнд, дөрөвдүгээр сарын 7-ны байдлаар ХӨСҮТ болон Монгол улсад сэжигтэй тохиолдол тусгаарлагдаагүй.
Сэлэнгэ аймагт тусгаарлагдаж байгаа таван хүний давтан шинжилгээнд коронавирус илрээгүй. Харин нэг хүний шинжилгээнд коронавирус илэрлээ. Ингээд Монгол улсад нийт батлагдсан 16 тохиолдол бүртгэгдлээ.
ХӨСҮТ-д тусгаарлагдан хянагдаж байгаа 14 иргэн, Истанбул-Улаанбаатар чиглэлийн тусгай онгоцоор ирсэн 192 иргэн, тандалтын зорилгоор хийсэн 25 шинжилгээнээс коронавирус илрээгүй. Нийт 237 хүнд шинжилгээ хийсэн. Өнөөдрийн байдлаар ХӨСҮТ-д 177 хүн ажиглалт хяналтанд байна.
Коронавирус илэрсэн нэг тохиолдол нь гуравдугаар сарын 26-27-нд шилжих шөнө хойд хилээр орж ирсэн. Ганцаараа тусгаарлагдсан байгаа. Анхны шинжилгээ 28-нд сөрөг гарсан боловч давтан шинжилгээгээр илэрч байна.
Ийм учраас хяналт, тусгаарлалт ажиглалт маш чухал. Тусгаарлалтад байгаа иргэд хүлээцтэй хандаж, онцгой нөхцөлд хамтарч ажиллаж, тэвчээртэй байхыг хүсч байна.
Сайн мэдээ бас байна. Япон улсад үйлдвэрлэсэн коронавирусийн эсрэг "АВИГАН" эмийг хурдан захиалж авч, ХӨСҮТ-д эмчилгээнд ашиглаж байна.
Бид коронавирусийн эсрэг дэлхий нийтэд хэрэглэж байгаа хамгийн сүүлийн үеийн эмийг хэрэглэж байгаа гэдгийг хэлье" гэлээ.
