Эрүүл мэндийн яамнаас коронавирусийн нөхцөл байдал, цаг үеийн мэдээллийн талаар ээлжит мэдээллээ хийлээ.

ДЭМБ-ын мэргэжилтэн О.Ариунтуяа: "Өнөөдрийн байдлаар 465.915 тохиолдол, 21.031 нас баралт мэдээлэгдлээ. Одоогоор хагас сая хүн халдвар аваад байна. Анхны тохиолдол бүртгэгдсэнээс хоёр сар гаруй хугацаанд 100 мянган тохиолдол бүртгэгдэж байсан бол сүүлийн хоёр хоногт 100 мянган тохиолдол бүртгэгдлээ.

Тохиолдол хавьтал бүрийг эрт илрүүлэх, оношлох, эмчлэх тогтолцоог бүрдүүлэх нь улс орнуудын сонголт биш харин үүрэг гэдгийг ДЭМБ-ын ерөнхий захирал онцолсон. Коронавирус нь агаар дусал болон ахуйн хавьтлаар дамжиж байна. Тиймээс гараа сайн угаах, хүний гар хүрэлцдэг гадаргууг арчиж цэвэрлэх нь вирусээс урьдчилан сэргийлэх хамгийн сайн арга гэж үзэж байна" гэлээ.

ХӨСҮТ-ийн ерөнхий захирал Д.Нямхүү: "Өдрийн мэнд хүргэе. Токио-Улаанбаатарын нислэгээр ирсэн иргэдийн 96-аас нь коронавирус илрээгүй. Бусад шинжилгээ үргэлжилж байна. Токио-Улаанбаатарын тусгай үүргийн онгоцоор ирсэн 100 хүний шинжилгээг хийх гэж байна. Тандалтын зорилгоор цуглуулсан 28 сорьцоос коронавирус илрээгүй. Мөн батлагдсан тохиолдлын ойрын хавьтлын 71 хүнээс коронавирус илрээгүй. Давтан шинжилгээнд оруулсан. 

Одоо Токио-Улаанбаатар, Берлин-Москва-Улаанбаатар, БНСУ-Улаанбаатар, Истанбул-Улаанбаатар гэсэн тусгай үүргийн онгоцоор ирсэн хүмүүсд ээлжээр шинжилгээнд оруулж байна. Үүргийн дөрвөн онгоцоор ирсэн хүмүүсд тактик боловсруулан шинжигээ авч байгаа. Тусгаарлалтын үед хяналт тандалтыг нарийн зохион байгуулалттайгаар хийж байгаа.

Гуравдугаар сарын 25-нд ХӨСҮТ-д тусгаарлагдсан нэг хүнээс илрээгүй. Өнөөдрийн байдлаар ХӨСҮТ-д тусгаарлагдсан 208 хүн байна.

Гуравдугаар сарын 26-нд ХӨСҮТ-д  хоёр, Дархан-уул аймагт хоёр нийт зургаан хүнийг тусгаарлаж, тандалт шинжилгээ хийж байна.

Халдвар илэрсэн өвчтөнүүдийн биеийн байдал тогтуун байгаа нь сайн мэдээ юм" гэлээ.