Эрүүл мэндийн яамнаас шинэ төрлийн коронавирусийн нөхцөл байдал, монгол дахь арга хэмжээ, сэжигтэй тохиолдлуудын талаар ээлжит мэдээллээ хийлээ. 

Эмнэлгийн тусламжийн газрын дарга Я.Буянжаргал: "Өнөөдрийн байдлаар 2057 иргэн тусгаарлагдаж, ажиглалтад байна. Сүүлийн 24 цагийн хугацаанд ОХУ-аас орж ирсэн иргэдээс Орхонд 42, Сэлэнгэд 2 , Дархан-Уулд 4, Баян-Өлгийд 33 хүн, Дорнод аймагт мөн 18 хүнийг тусгаарлан ажиглалтад аваад байна.

Мөн нийт 297 эмч, эмнэлгийн ажилтад иргэдтэй хамт тусгаарлалтад ороод ажиллаж байна.

Эмчилгээ, оношилгоо, тандалт судалгаандаа олон улсад ашиглагдаж буй арга техникүүдийг ашиглаад явж байгаа. Ерөнхийдөө бол эхээс урагт дамжих, ураг амьгүй болох, зулбах, төрөлтийн гажиг үүсэх зэрэг нь нотлогдоогүй байна.

Тиймээс халдвартай эх амны хаалт зүүгээд, гараа ариутгаад хүүхдээ хөхүүлэхийг ДЭМБ-аас зөвлөж байна. Диализ эмчилгээнд орсон иргэд эмчилгээнийхээ дараа бөөгнөрч сууж хооллохыг хориглож байна. Дэлхий дахинд олон эмийн туршилт хийгдээд явж байгаа" гэв.

ХӨСҮТ-ийн захирал Д.Нямхүү: "2020 оны гуравдугаар сарын 19-нд Истанбул-Улаанбаатарын чиглэлийн тусгай үүргийн онгоцоор ирсэн хүмүүсээс 22 хүний шинжилгээниы хариу сөрөг гарсан. Өмнө нь 24 хүнийг сонгож, шинжилгээ хийсэн хариу сөрөг гарсан талаар мэдээлж байсан. Тус онгоцоор ирсэн 46 хүнээс шинжилгээ хийсэн байна. Үлдсэн 200 гаруй хүнд өнөөдрөөс сорьц авч, үргэлжлүүлэн шинжилгээ хийнэ. 

Орхон аймагт тусгаарлагдсан зургаан хүнээс шинэ коронавирусийн халдвар илрээгүй. 

Өнөөдрийн байдлаар ХӨСҮТ-д 289 хүн тусгаарлагдан, хяналтад байна. 2020 оны гуравдугаар сарын 23-нд Алтанбулаг боомтоор орж ирсэн зорчигчдоос Сэлэнгэ аймагт хоёр, Орхон аймагт нэг, нийт гурван сэжигтэй тохиолдол тусгаарлагдан, ажиглалтад тандалт хийж байна" гэв.